Allmächd, Herr Söder
Der Tandler schreibt aus gegebenem Anlass auf Fränkisch
Herr Minisderbräsidend, als easchdes gradulier ich Ihnen amole zu die Erfolge in der Corona-Eindämmung. Abber grad die san der Grund, warum ich Ihr weideres Vorgehen (und nadürlich aa des von Resddeutschland) a wengale hinderfroochen muss: Der ganz große Stichdooch war ja der ledzde Sunndoch, 19. Abril. Bis dohin hod g’haaßn, ma schaud je noch Infekdions-Kurvnwerde, wie’s weider geh’n soll.
Jetzadle sammer ja über des gsedzde Draumziel von aaner oogschdeggd’n Berson bro Infizierdn weid nausgschoss’n und es wor rein schdadisdisch blos no a dreividdl Oogschdeggder bro Infizierdn. Do wunderd’s mi dann hald, dass Sie do dann ieber an rechd langa Zeidraum des ganze kuldurelle Lebn eig’frorn hamm – bei uns in Nöddlingen redd’ ma scho dervo, dass aa dia Mess’ 2021 ausfall’n soll.
Bis Augusd 2020, wo vielleichd di earschd’n Massnveranschdaldungen widder erlaubd san, san’s no 14 Wuchn, in China worn’s in grad amole siebn Wuchn mit Corona über’m Berch. Do maan ich hald, dass ma uns scho a bissala frieher an scheena Sommer mit Bierzeld und so hädd gönna kenna.
Odder schdeggd hinder dene elend lange Auflachn no wos anderschd’s? Vielleichd a Belaschdungsdeschd für des Volk mid folgende Griderien: Agzebdier’n die Leid, dass ma ihre Grundrechde wie Bewechungs- und Versammlungsfreiheid
massiv beschneided? Ja, auf jed’n Fall. Nemmas Polizeiüberwachung hie bis zu unsinnige Verbode? Ja. Lossd mer zu, dass Familien ausanand griss’n wern und Oba und Oma allans derham hock’n bleim? Jawoll. Gfälld dene Leid vielleichd sogar di Kombination von Nodlage und’m schdargn Moo (also Ihne)? Aber hallo, Ihre Umfragewerde schieß’n sauber nauf, gell? Und dann di Beschallung: Alle zehn Minuddn hörd ma gebetsmühlenartig auf jed’m Radiosender, dass mer a Krise ham, die wo mer durch unser’n Zusammenhald großardig durchschdenga; aa im Subbermarkd und am Geldaudomadn brobagiern’s den rührendn Zusammenhald. Kanner froggd si, was des für a Zusammenhald sei soll, wo sich jeder derham vergriechd und andre Leid meidet, als ob’s di Best am Orsch häddn. Herr Söder, ich bin weid von Verschwörungsdeorien endfernd – abber ich kennd mer vorschdell’n, dass ma als Schdaadscheff so a Krise, wann’s scho amoll do is, glei zu am Schdressdesd midnuzd für an Ernsdfall, der wo no schneller als a Pandemie kommd und sofordiges Mitziechn von di Bürcher fordert. Nemmen’s mer’s ned übel, aber in’rer Demogradie muss scho erlaubd sei, dass aa a klanner Dandler rigorose schdaadliche Massnohma hinderfroochd.
Der Dandler