Auf’m Abschdellgleis
Die Freude des Tandlers über das neue Landratsamt im Bahnhof ist getrübt
Imit hab mi fei scho rechd g’fräd, wia
deam Landratsamt an ooserm Nearlinger Bahnhof a Schdickle Donauwörth noch Nearle komma isch. Do war des Landratsamt nimme im ferna Donauwörth, von wo aus mir Nearlinger ferngschduiert regiert wora sin; abgsähe von a baar weit ieber’d Schdadt verschdruite kloine oinzelne Behörde. Ja, i hab mein Frieda g’macht mit die Donauwörther, jetzt war mer beianander – hab i gmoint – und ka mit am kloina Schpaziergang dia groaßa Behörde erreicha und isch koi verwaldeder Provinzhansl meahr.
Bis i mir dann amole denkt hab, nutzschd dia wunderbara nuia Situation, meldsch endlich amole dein Audo-Ahänger ab, dei alds Modorrad auf dein Neffa um und loschd d’r dein ieberfälliga nuia Führerschein ausschdella. Isch ja älles oi Ressort, also d’ Kfz-Schdell, do got älles in oim Aufwasch. Friaher war dia a ganzes Schdick weit dausda, do hab i mi nia aufraffa kenna. Wia i also nakomm, schdodt und hockt earschd amola a Schlang vor’m Bahnhof. Mei, des isch jatzt hald iebarall so, also schdell i mi a. Noch’rer Weile frogt mi dr Ma vor mir ganz beiläufig, um a weng in’s G’schpäch zum komma: „Sie hom scho an Termin?“Hab i ned g’habt, no hodder g’moind, i soll earschd amole nei, mir oin gäba lossa. I gang nei und wer glei von zwoi uniformierte Securities aufg’halda. Ob i an Termin hab, will d’r oine wissa. I sag: „Noi, drum bin i ja jetzt do.“Er erklärt mir, im Bahnhof hot ma zwar Termine, kriagt abber koine. I sag, i muaß doch bloß zwoi Mädr weidr an iahm vorbei, dann ka i mir ja oin gäba lossa. Er schütteld energisch da Kopf und in meiner Phantasie als KrimiViel-Gucker hab i irgendwia vor Ooga g’habt, wia d’r andre unauffällig a verschdeckda Waffe entsichert. Jedafalls hot mer dr earschde a Kärtle mit ‘rer Telefonummer gäba und g’moind, do däd i mein Termin kriaga.
„Des isch ja a Donauwörther Nummer“, hab i g’sagt und nommol auf des Büro zwoi Mädr weider zoigt, wo i na wolld. Er hot signalisiert, dass jetzt ausg’redt isch, also bin i naus auf a Bänkle und hab agruafa. A junga Froo war dra, i hab’ ihr g’sagt, was i brauch und sie hot g’sagt, koi Problem, sie suacht mir drei Termine raus. I hab’ g’sagt, i hab als Volksversorger an syschdemrelevanta Beruf und es wird doch meeglich sei, drei Audoagelegaheida bei oim oinziga Termin auf d’r Kfz-Schdell zum regla. Des war ned meeglich, jedafalls bei ihr ned und si hot mi weiderverbunda zu am Maa. Deam hab i erneut mei Aliega erklärt, no hodder g’moind, Termine gibt’s online. „I hab sie jetzad abber am Abbarad, do kennad sia mir doch an Termin gäba.“Noi, nur online, hodder g’sagt. Was mit Leit isch, dia wo koin Computer hom, hab i g’frogt und durchaus signalisiert, dass i iahn länger nerv, als wia er mir an Termin gibt. Also hodder mer oin gäba.
Wia i ihn wegdruck, kommt widder dear Ma auf mi zua, der wo zuvor vor mir in d’r Schlange war. Ob i oo an Termin in Nearle kriagt hab? Er hot nämlich amole oin online g’macht und hot prompt noch Donauwörth müaßa. I hab sofort zruckgruafa, widder dia earschda Froo dra g’habt, dia hot mi glei widder weider gleidet, abber der Ma von vorhin war nimme do und irgendwann bin i aus d’r Warteschleife g’floga. Drei Dag schpäder hab i endlich erfahra, dass i tatsächlich an Termin in Nearle hab. Tatsächlich verschbür i jetzad a gräaßara Nähe zu Donauwörth – dia Bürokratie wia zu Kaiser’s Zeida isch a guad’s Schdück näher g’ruckt. D’r Tandler