Wie kommen die Vereine durch die Pandemie?
Der Schualleahr Fingerle macht sich Gedanken über Fußball und Musik
Seit nunmehr fast einem Jahr ist auch das Vereinsleben ins Stocken geraten. Gerade mal im späten Sommer und im Herbst waren für manche Vereine unter großen Beschränkungen kurze Übungszeiten, aber kaum Auftritte möglich. Zahlreiche Jubiläumsfeste landauf, landab wurden 2020 abgesagt und verschoben in der Hoffnung, dass sich im Jahr 2021 alles wieder zum Guten ändert. Der Lehrer Fingerle macht sich da natürlich auch seine Gedanken! Aber eines ist auch klar: Wer mit dem Finger auf andere zeigt, auf den selber zeigen gleich drei Finger.
Des gilt oh für mi! Denn do falla mir glei zwoi sodde Sacha ei: In dr Kirch hab e vor a paar Wucha beim earschta Mol mit samt dr Maschk mitgsonga, obwohl ma des gar nemme däf. A andersmol hab e a Ehepaar mit Ked ins Haus glosst, obwohl doch bloaß oiner rei däft hätt. Es isch abr nix passiert, wia ma enzwischa woiß.
Abr jetz zua de Vereine. Ma globt gar net, wia viel Lusum ma zor Zeit grad am Obad hot, wa’ma net furt ka, weil ja Senga, Blosa, Sport mit andere treiba ond oh Versammlonga net erlaubt sen. Bei mir alta Ma’ isch des ja fascht egal, doch dia Jonge braucha doch G’sellschaft ond G’selligkeit mit andere. Dia Schperrschtond hons ja enzwischa om a Schtund verkürzt ond ds Alkoholverbot auf öffentliche Plätz isch bei os em Landkreis oh aufg’hoba, abr der richtea Mannschaftssport isch abbl no net erlaubt.
Dia ganze Fuaßballer könnta ja jetz ihre alta Saison ferte schpiela an dear Schtell, wo’s abrocha wora isch. Dia hon ja alle mitta en dr Rückrunde aufhöara gmiasst. Des hot de Nearlemer vorearscht voar‘m Abstieg g’rettet. En de no acht Schpiele, wo no ausschtanda, kennas des abr no zom Guata richta. Ond dia Fuaßballer von Holzkircha en dr BZL Schwaben Nord sen oh bloaß fünf Punkte zruck ond kennta oh no vom letschta Platz weg komma. I ben echt gschpannt, wia des weiter goht.
Weil me abr oh für Blosmusik interessier, däte oh gera wissa mega, was do em Busch isch. Als earschts em Joahr blost ma amml beim Stabafescht ond beim Messomzug z’Nearle. Drnoch schtanda huir groaße Musik-Feschtr a, beischpielmäße en Fremde ond en Leahme.
In Fremde hot ma allen Grund zom Feira: Dr Musikverei wird 150 Johr alt, d’ Jugendkapell gschobt auf 40 Johr erfolgreiche Nochwuchsarbat zruck und des Blasius-Festival gi’ts seit 5 Johr. Des war für dia A’lass gnua, dia zwoi groaße Blosmusikfeschter mitanander zom verschmelza. Blasius ond des Bezirksmusikfest im Bezirk 16 Donau-Ries des AllgäuSchwäbischen Musikbundes gi’ts – wann alles klappt – vom 15. bis 18. Juli. Z’ Leahme feiras scho vier Wucha friaher am 12. ond am 13. Juni, alles em Freia, wia e g’hert hab.
Dia Chöre em Rias sen’ wia überall no schlechter dra. Dia däffat net senga, nemme amol en dr Kirch. Oh net z’viert. Ob dia alle wieder drbei sen, wanns vielleicht em Herbscht wieder weiter goht? I ka mer’s net denka!
Jetz gi’ts aber net bloaß dia drei Gruppa, sondern oh no gnua andere, wia heimatliche Vereine, dia Vereine vo de Schualleahrer, do wo i oh drzua g’hör ond wo zurzeit gar nix lofft. D’Schütza hon huir koin Sebastianstag halta däffa; d’ Veteranaverei miassa luck lossa, grad wia alle Vereine, dia mit Koscht [Kunst] zom toa hon.
Drom heb e mein Zoigefenger ond appellier an de Politiker, wenn’s a weng goht, des normale Leba wiedr zua zom lassa.