Fingerle und die Zeugnisse

Tipps für Eltern und Schüler

Nicht für die Schule, für das Leben sollen wir lernen. So ha’mer des en dr Oberschual in Nearle glearnt, natürlich auf Lateinisch: Non scholae, sed vitae discimus. Der alte Philosoph Seneca aber meinte damals schon sinngemäß das Gegenteil: Leider lernen wir nicht fürs Leben, sondern (nur) für die Schule. Ond des is bis en osere Täg so blieba. Ma learnt oft Sacha, dia ma nia mehr braucht, abr’s 1x1 losst ma schleifa. Do goht ma drvo aus, dass de Kender bloaß a paar Rechnonga wissa miassa, beischpielmäße 1x8=8; 2x8=16; 5x8=40; 10x8=80. Ond wenn des a Ked woiß, nochta ka’s alle übrige Rechnonga ableita: 3x8 is dann 2x8 +1x8 also 16+8=24. Kapiert? Noi? Dann no amol a Beischpiel: 7x8 is 5x8 ond 2x8, also 40+16, z’samma

56. Os hon voar fascht 70 Johr halt glearnt ond em Schlof saga kennt: 7x8=56. Nor so viel zom Zitat!

Osre Kender learna für d’Probearbata – ond drnoch ka ma des wiedr vergessa. In viele Fächer isch des verschtändle, weil ma heit alles im Computer odr im Handy nochgschoba ka, in Sekunda! Bei os hot ma zwoi, drei Lexikoner ghet; abr dia schtanda oh bei mir jetz bloß no im Regal, meterweis. Seltenscht, dass i’s raus hol ond was nochgschob. Do bin i oh mit dr Zeit ganga ond suach im Computer; do brauch i net amol vom Schtuahl aufschtanda.

Ond dia Schulkender solla ja des oh learna ond so macha. Des ghört zom nuia Onterrichta. Teamgeist und Kreativität sen gfrogt, nemme Wissen alloi ond guate Zeugnisse. Kender ond Erwachsene learna dann am beschta, wenns wissa warum ond wozua sie ebbas learna. Vielleicht hons a Fräd, odr weils praktisch is odr nützle.

Seit zwoihundert Johr isch d’Schual drnoch ausgricht, dass ma alles learnt, was ma für sein schpätera Beruf braucht hot: Volksschialer für Handwerksberufe, Mittelschialer für Kaufmännisches ond Oberschialer, dass schtudiera kenna. Ond do hosch a Zeignis braucht. Noatfalls bisch ebba no amol in dia gleicha Klass ganga ond hosch wiederholt. Grad so isch schon ganz berühmte Leit ganga wia den Politikern Joschka Fischer, dem Edmund Stoiber oder dem Winfried Kretschmann. Auch die Dichter Gerhart Hauptmann und Thomas Mann drehten eine Ehrenrunde. Und sogar der Albert Einstein hots net auf Anhieb g’schafft. Do siggt ma amol, dass ma’s trotz Schual zu was brenga ka.

Des hoißt, Ihr liabe Eltern: Machat Eich koin Koopf wega deam Corona-Johr. Dia Kender holla des scho wiedr auf, was jetz vielleicht versaumt hon. Ond dia Proba en dr

4. Klass sen ja huier reduziert wora. Des machts oh a weng leichter. Ma däff net nor auf d’Nota gschoba, sondern oh auf dia Bemerkungen. Bei os hots nor Zahla geba vo 1 bis 6 ond do wara d’Eltra zfrieda, wann’s nor Oiser, Zwoier ond Dreier geseah hon. Ab de 1980erJohr hot ma langsam do en dr Grundschual damit afangt ond hot nor mehr en drei Fächer Nota gäba, in Deutsch, Mathe und Sachkunde. Heit kriagas en de earschte zwoi Jahr nor mehr Beurteilungen. Abr do isch oh Vorsicht bota. Wenns do hoißt: „Der Schüler bemüht sich, schön zu schreiben“, hoißt des, dass’r a saumäßiga Schrift hot; Eltra abr läsa bloß, dass’r „schön schreibt“. Fürs Ked isch ja guat so. Abr dean Ui net ab! Alle wera was, oh wenn heit gar koi Not’ meahr em Zeignis schtoht.

Uier alter Schualleahr Fingerle!