Earscht denka, nocht koffa
Schullehrer Fingerle kritisiert einen Schildbürgerstreich in Herkheim
Weil a Schualleahr ja abbl was woiß, oft sogar bessr woiß als andere Leit, muass e heit scho amol Schtellung nemma zua a paar Probleme en Nearle ond seine Schtadttoil. So moina zwengscht dia Rieser wann e les: „Beschwerliche Wege – Immer wieder beklagen sich Bürger über den Straßenbelag in der Altstadt. Die Verwaltung will deshalb ein Gutachten erstellen, die CSU ist dagegen.“Dr Schwarzer Jörg hot voargschlaga, oifach alle mitanand durch d Schtadt z’ganga ond des selber auszumprobiera, abr dia andere hon gmoit, des Thema wär so wichte, dass ma doch a Guatachta ei’holla sott, oh wenn des 30 000 Euro koscht; ma tät ja 60 Prozent an Zuaschüss wiedr kriaga. Ond do wär sichergschtellt, dass oh andere Bürgerkreise mitreda könntat, wia Vertreter vom Seniorenbeirat und von de Behindertenbeauftragte. Des fend dr Schualleahr Fingerle ganz guat, weil e halt oh scho so alt ond oh nemme so gut z’Fuaß ben.
Ond glei oin Tag schpäter ischs nägschte Problem en dr Zeitong gschtanda! Als guater ond aufmerksamer Zeitongsleser ka oim ja net entganga sei, dass dia Herkhemer färd a nuis Fuirwehrauto kriagt hon für an Haufa Geld. Ma hot scho vorher gwisst, dass des Auto a weng groaß isch fürs Schpritzahaus daußd em Doarf; abr ma hot gmoit, mit a paar Änderonga, wia vielleicht Rolltore, wurds scho neipassa. Jetz, noch iber am Johr ond noch langem Überlega, wurd’s ernscht (vielleicht weil wiedr a Wahl aschtoht?) ond ma muass handla! A
Anbau muass her, abr dear koscht! D’ hon titelt: „350 000 Euro für einen Anbau ans Feuerwehrhaus“ond lang ond broit dia oinzelne Schtellongnahma vo de Stadtratsfraktiona nei gschrieba. Was d’Bachmänne net gschrieba hot, isch, dass ma friaher do drfür „Schildbürgerstreich“gsagt ond dia Erfinder zweggs sowas bled nagschtellt hot. Was soll ma doa? Ds Fahrzeig isch kofft ond ma ka’s ja net johrelang em Freia schtanda lossa onds Eis em Wenter akratza, bevoar ma fahra ka. Also wurd baut (Wahljahr!). Dr OB Wittner isch a Realischt ond moint: „Wir können das Rad nicht zurückdrehen“ond hofft, dass dr A’bau zletscht net so tuier wird wia plant. Aber des ka’ er doch selber net globa! Dr Fingerle moint: Earscht denka, nocht handla, beziehungsweise koffa.
Ond am Mede gohts om Grosselfinga. Dia sen en am Funkloch, wia ma 2019 feschtgschtellt hot. Ob d’Schtadt vielleicht an Plaatz hätt für so an Funkmaschta? Dia muass passa, abr d’ „Funkturm GmbH“will an über 43 Metr hoha Tura baua, akkrat voar am Baugebiet! Ond wer will scho so an A’blick von dr Terrasse aus? Koiner!
Abr so schnell schiaßa Preißa net! Jetz goht des Verfahra ja earscht a. Dia „Träger öffentlicher Belange“miassa no ghärt wera. Des isch amol beim Landratsamt die „Untere Naturschutzbehörde“, abr oh dr Bauraverband, dr Stadtheimatpfleger, dia Denkmalschutzbehörde, weils ja mitm Fundament en Boda nei miassa ond was Archäologisches rausbaggert wera könnt. Also, do fliaßt no viel Wasser d’Eger na, moint
uier alter Schualleahr Fingerle