Ein neues Hallenbad für Nördlingen!
Schullehrer Fingerle weiß, dass Schulschwimmen teuer ist
Der Nördlinger Stadtrat hat in seiner Sitzung vom 25. Juni 2020 mit 18 von 20 Stimmen beschlossen, dass das aktuelle Hallenbad an der Gerhart-HauptmannStraße nicht mehr ertüchtigt wird, sondern im Rieser Sportpark ein neues Hallenbad gebaut werden soll. Laut der Kostenschätzung der Stadt ist der Neubau wirtschaftlicher als die Sanierung. Nördlingen ist die einzige Kommune im Nördlinger Ries, die noch über ein Hallenbad verfügt. Angesichts klammer Kassen durch die Corona-Krise ist eine Modulbauweise mit zwei Abschnitten vorgesehen. Erst könnten das Schwimmbecken mit sechs Bahnen, das Lehrbecken und der Kinderbereich für 14 Millionen Euro gebaut werden. Eine Sauna, Rutschen oder gar ein Außenbereich könnten später folgen.
Genau a so isch’s in de Riaser Nochrichta gschtanda, des hab e selber glesa, ausgschnieda ond aufghebt. Ond dr nuie OB vo Nearle, dr David Wittner, hot gsagt, man miasst se jetz traua ond mutig das Projekt trotz der Corona-Pandemie a’packa, schliaßle dischkutiert ma scho seit Johre über a nuis Hallabad. Jährle isch für des Bad a Verluscht von einer halben Million Euro ei’kalkuliert. OB Wittner hofft, dass dr Landkreis ond dr Freistaat an Toil drvo übernemma.
Abr so lang’s koi nuis Bad git, isch’s oh für dia Schuala bleed, weil dr Schwimmunterricht an de Riaser Schuala weiter leidet ond des net nor zwecks Corona, sondern oh zwecks fehlender Kapazitäta. Ds Almarin in Mönchsdegge, wo mei friahere private ond dienstliche Schwimmhoimat gwest isch, macht vermutlich in absehbarer Zeit nemme auf. Ond oi Bad für so viele Riaser Schualkender isch oifach zweng! Schualschwemma isch Luxus. In de Lehrplän vo viele Schuala taucht Schwimmunterricht deswega nor no schporadisch auf. Gleichzeitig könna abr immer wenger Grundschialer oh schwemma. „Nur jeder Zweite verlässt die Grundschule mit dem ‚bronzenen
Schwimmabzeichen’. Dieser Befund zeigt, wie wichtig Schulschwimmen eigentlich ist – oder wäre, wenn es stattfände.“So habbes en am Amtsblaat glesa. Aus meiner 40-jähria Erfahrong woiß e natürle, dass Schualschwemma viel Geld koscht ond bei de Schualverbandsburgermoischtr koi hoacha Priorität hot. Ond weil en de vergangene Johrzehnte oh em Rias a paar Hallabäder g’schlossa wora sen, sen jetz etliche Schuala gänzle außerhalb der Reichweite von am Schwimmbad. Abr oh der personelle Aufwand isch heacher als bei normale Schportschtonda, denn in der Regel braucht ma do mindeschtens zwoi Aufsichtspersona – ond des bei deam Lehrermangel! Zudem sen völlig zu Recht oh die A’forderunga an die Schwimmlehrer gschtiega: A Rettungsschwimmschein wird heit im Gegasatz zu frühere Zeita vorausgesetzt, damit ma Schualschwemma überhaupt ertoila däff. I hab ja dia Qualifikatio schon an dr Hoachschual gmacht ond schpäter sogar no amol aufgfrischt! Ond i ben über zwanzg Johr mit ra Kollegin em Bus of Degge gfahra, alle vierzeh Täg! Des war oifach für d’Kender a scheana Abwechslong ond i däff saga, dass alle noch am Schualjohr schwemma kennt hon. Zwengscht ds „Seepferdchen“hons zammabrocht, dia Afänger; dia moischte abr hons „Freischwimmen“oder gar des „Fahrtenschwimmen“gschafft ond alle Väter ond Miater hon koi Angscht meahr z’haba braucht, wenn ihre Kender dann am Nommedag en d’Wenz zom Bada ganga sen. Lange Rede, kurzer Sinn: Bauat so schnell wia möglich des nuie Hallabad; des tuat alle Leit guat ond nocht braucht ma nemme of Gunzahausa ens „Juramare“, wemma amol wiedr schwemma will odr demnägscht noch Oola, dia ja oh baua wölla.
Des moint uier alter Schualleahr Fingerle