Wer die Wahl hat
Die Wahlplakade sinn ball all ab. Die paar, wo noch hänge, sinn so vekrumbelt, dass die Gesichter druff – sogar die vun de Gewinner - so aussiehn wie meins morjens an Aschermittwuch.
Eenesdääls bin ich froh, dass die Wahle erom sinn. Schun wuchelang vorher nur Balaawer unn Zoores – unn Omfraache. Ma kennt menne, Wahle wäre nur noch Veanstaldunge fa se gucke, ob die Prognose vorher aa richdisch ware.
Was iss vun Politiker im Fernseh net jede Oowed alles vezehlt woor! Viel hann vegess, dass ma aa annere moo zuheere, se ausredde losse unn Ausredde losse soll. Ich vestehn joo, dass ma sich vor de Wahl net gewählt ausdrickt; awwer ich bin wählerisch unn hann genau zugeheert, wie oft nix gesaat woor iss. Ma hat geschwätzt, viel vesproch oder sich nur veschwätzt, manche hann sich aa veschätzt.
Wahle erinnere mich an Lyoner: wie vor sticker zwansisch Johr de „Schröder“gewunn hat, ware die eene froh, fa annere war‘s die „Höll“- awwer „Schwamm“driwwer! Unn ‚s geht om die Worscht, awwer immer meh Leit iss das ganze Geworschtel worscht. Manchmoo kennt ma sich ringele vor Lache unn iwwer de Inhalt wääß nimmand richtig Beschääd. Oft fehlt e bissje Geschmack, dann gebt ma halt sei Senf dezu.
Annererseits isses aa schad, dass die Wahle rom sinn. Ich hann Besuch kriet vun Leit, wo ma gesaat hann, wie doll mei Vorgarde aussieht unn wie wichdisch grad mei Stimm wär unn wenne ich am beschte wähle sellt. Uffem Marktplatz ware samschdaas Stänn, dehinner gut gelaunte Leit wo freindlich met ma geschwätzt hann. Unn was hat ma kenne abstaawe! Am eerschte Stand e Parkscheib, e Lineal unn fa ‚s Enkelche noch e Luftballon. Wie ich dann iwwer alle annere Parteie hergezoo bin, hann ich noch drei Dauerschreiwer kriet, hann däärfe e Schnäpsje trinke unn zwää Pizzastickcher esse. Sogar Kondome hann se vedäält, bestimmt awwer nur an Wähler vun de annere Parteie.
E Stand weider hann ich an denne vun vorher kenn guter Fadem gelosst, hann sofort e Rostwerschte kried, ma noch enns fa deheem inpacke losse unn in de Tuud ware e Flascheöffner unn e Schnebbekapp drin.
Mei Nochbar hat ma vezehlt; er wär beirer ganz kleen Bardei ganz lang stehnblieb, unn nur een enzisches orschäärisch Prospektche hätte se ‚m in die Hand gedrickt. Vor Wut hätter sunndaas in de Kabien uffem Wahlzettel denne ehr Krääse dick kreiz unn quer dorchgestrich.
ist Vertreter der rheinfränkischen Mundart. und wohnt in Kirkel-Neuhäusel. Weitere Informationen über seiner Person und Publikationen gibt es im Internet unter www.mundart-saar.de.