In der Pfalz soll es bald auch „Kuh-Taxis“geben

Bereits in diesem Jahr könnte im „Arche-Dorf“in Mörsbach das ökologische „Esel-Taxi“für Besucher anlaufen. Die Ortsvorsteherin Murer glaubt, dass auch Kühe für den Job geeignet sind.

Sie männe’s jòò all so gudd mid ämm. Saan se. Kam’má glawe unn hinnerhär merge: Bisch widder mòò inngesääfd worr, forr dumm vákaaf. Nidd immer is das so plumb uffgezòh wie in rá Radio-Reglame vum’me riesische Discounter im Dezember. Dòò waa se heere mid Gläggschesbimmle, Schmeischelmussig unn samdweischer Weihnachdsmann-Stimm: Dòòdeforr, dass Weihnachde e rischdisch scheenes Feschd werd, hann se e gans besonneres Exdra-Aangebood, nämlisch gans billisch Sellerie im Glas. Sellerie! Forr e scheenes Weihnachdsfeschd! Isch ham’misch ehrlisch gefròòd: Hann die änner renne odder isch? Má solld wohl weje Sellerie hinhubse unn mid vollem Wäänsche raustabbe, odder? Awwer uns is es dòòbei faschd gang wie Adam unn Eva, wie se vum Abbel gess hann: Uns sinn aach die Aue uffgang.

Klaa: Geschäfde vákaafe, forr Geld se vádiene, mache awwer, als gääng’s ne vòr allem drum, ämm gligglisch se mache. Als dääde se das, was z.B. jed Wuch in ihre Prospegde stehd, seminneschd halwer váschengge. Dòò wääs isch wenischdens mòòl aus meiner Erfahrung, dass má genauer hinnguggd. Weil: E Mausefall, wo so uffällisch uffgestelld werd, dòò muss má jòò nidd ninntabbe. Awwer wie is das mid de ville klääne Falle, wo die Gefah gans stiegum hinnerum kummd? Bei demm, was de näwebei machschd, nidd so genau hinnguggschd, weil’s um klääne Beträäsch gehd? Immerhin kaafe mir faschd jed Wuch in demm Sellerie-Lade. Ob die uns wohl äfder vá..., na ja, saa’má váäbbele? Unn mir hann Tomade uff de Aue?

Unn dann falld uns uff, wie se ämm z.B. bei dá Flissischsääf insääfe wolle: Die gebbd’s forr 55 Cent mid 500 ml in dá stabil Plasdigflasch mid Bumb, wo die Sääf rauskummd. Also schunn bisje uffwendisch unn zu schad zum Wegschmeise. Desweje kridd má ach forr 1,55 € im billische Beidel 750 ml zum Nòòfille. Gudd forr die Umweld? Na ja! Unn forr de Geldbeidel? Peifedeggel! Reschend má’s um, koschd die gleisch Meng im billische Beidel 1,04 €, also faschd es Dobbelde! So bestädischd sisch ach bei unserm Lieblingsdiscounter e aldi, aldi Erfahrung: Die váschengge nix! Wo se disch betubbe kinne, mache se’s, egal, wie gudd se’s angeblisch mid dir männe. Weil: Die Sääf is bestimmd känn Äänselfall. Also: Grad dord, wo de glawe sollschd, sie wäre die Wohlfahd: Loss disch nidd insääfe! Aue uff! Iwwrischens: Mei gudder Ròòd koschd nix. Isch männe’s aus lauder Guddhääd äänfach bloos gudd mid eisch. Ehrlisch!