Wenn’s Mariesche nidd schwimmd
Zutiefst bekümmert hört Mundart-Autor Peter Eckert Jahr für Jahr: Immer weniger Kinder lernen noch schwimmen. Dabei ist es nie zu spät, Versäumtes nachzuholen, wie ihn eine Bekannte gelehrt hat.
Pack die Badehose ein, nimm dein kleines Schwesterlein und dann nüscht wie raus nach Wannsee!“So had 1951 „Die Kleine Cornelia“gesung. Bei uns in Sabrigge waa‘s annerschd: Mei Schweschdre hann e klääner Bruder gehadd; mid demm sinn se ins Deidschmihlebad gang.
Heid is das nim’meh so äänfach. Unn so heerd má vun Jòhr zu Jòhr: Immer wenischer Kinner kinne schwimme. Dann kummd e Uffschrei, má missd ebbes mache. Unn‘s Jòhr druff kinne‘s grad schunn widder wenischer Kinner. Obwohl doch jeder wääs, dass de Hans nimmermehr lernd, was es Hänsje nidd gelernd had. Also: Má sorschd heid nidd vòr, dass so vill Leid wie meeschlisch in junge Jòhre schwimme lerne, was ach gudd forr die Gesundhääd wär. Nää, mir sòrje heid schunn vòr, dass die DLRG ach späder reischlisch se duun kridd, vòrausgesedzd, dass die genuch Redder finne. Was má heid noch nidd wääs: Ziehje die dann mehr Halbdoode odder Doode aus em Wasser?
Ääns vun denne „Hänsjer“is e Mariesche, die Frau Maria. Sie had e Kindhääd gehadd, in der forr schwimme se lerne känn Zeid unn Geleejehääd waa. Unn späder, ná ja: Was es Mariesche nidd lernd ... Nòòdemm die Frau Maria vun Sabrigge weggezòh waa, weid weg, ham’má nur noch telefonierd. Unn äänes Daas vázehld se mir am Telefon: „Stelle Se sisch vòr: Isch hann jedz tadsäschlisch schwimme gelernd. Unn jedz bin isch faschd jede Daach im Schwimmbad.“Isch waa baff.
Jedz kinne Sie nadiirlisch saan: Gudd unn scheen, awwer so ebbes Besonneres is das aach widder nidd. Stimmd – normalerweise. Awwer wie das passierd is, waa se knabb 86 Jòhr ald. Und isch waa dòòmòòls 38. Doll, hann isch gemännd, wenn isch mòò ald bin, meeschd isch aach so gudd druff sinn. Unn seid der Zeid had e Sadz vun dá Marie von Ebner-Eschenbach unner meiner Schreibdischunnerlaach gelää: „Má bleibd jung, so lang má noch lerne, neie Gewohnhääde aannemme unn Widderspruch ertraan kann.“
Trodzdemm: Mid demm Widderspruch kumm isch nidd klaa: Nur weil’s so Ausnahmefäll wie die Frau Maria aach gebbd, derf má desweje in aller Gemiidsruh zugugge, dass heid die Hänsjer unn Mariescher zwaa mid dausenderlei deirem Fubbes zugeschmiss werre, awwer ebbes so wischdisches nidd krien? Also: Isch männe nää! Unn was männe Sie?