Hann Sinne a Sinn?
EDichter hat gesaat: „Wer Schmetterlinge lache heert, kann aa Wolke rieche“– Ach wie wär der Spruch doch scheen, däät ma so dorch‘s Lääwe gehn. Viel heere kenn Schmetterlinge meh lache, awwer die Fleeh huuschte. Sie kenne nimmie de Geruch vun frisch gemähte Wiese odder vun Luft noo me Gewitter unn wisse aa net, wie Quellwasser odder e Stick „truckenes“Brot schmecke kenne. Deswää sellte ma uns freie, dass ma die Welt net nur mettem Vestand vestehn kenne – sunscht wäre viel Leit aa arm dran.
De Vestand kann genau so teische wie die Sinne. Wie oft iss meer in de Schul e ladeinischer Text spanisch vorkomm! Ich hann geheert unn gesiehn, dasses im Halbkrääs vum Thales nur rechte Winkele gebt – awwer nie kabeert, warom! Ich vestehn aa unser Coronapolitik net. Ich krien das, was ich Daa fa Daa lääse unn heere, met dem, was ich siehn, nimmie uff eener Nenner, unn meer „vegeht Heere unn Siehn“.
In unserer Sprooch hann Sinne jo e großie Bedeitung – awwer doo gebt‘s als Probleme. Hat ma ebbes „bekeppt“, hat ma‘s „begriff“– obwohl ma‘s net fasse kann. Aa wammer sich met Fingerspitzegefiehl vortascht, vebrennt ma sich trotzdem als die Fingere.
Viel kenne net Zuheere, well se stännisch schwätze. Sinn die moo ruhisch, sellt ma se uff kenne Fall unnerbreche. Kenn Mensch spitzt bei so Leit die Ohre odder iss sogar „ganz Ohr“– vor allem, wann se emm wää ebbes stännisch in de Ohre leije.
Wann emm de Chef im Au hat unn schääl anguckt, hääßt‘s „Vorsicht“.
Der nemmt kenn Ricksicht unn meer hann schlechte Aussichte, wanner de Ansicht iss, meer geheerte zu denne, wo „net siehn, net heere unn kenner Herd noogehn“. Awwer wammer immer de Herd noolaaft, sieht ma halt fascht nur Äärsch vor sich.
Lernt ma Leit kenne, werre die beschnuppert. Wann uns die Nas vun jemand net gefallt, er uns sogar stinkt unn ma ne net siehn unn rieche kenne, vedufte ma am beschte – wann ma e gudes Näsje hann, bevor ma die Nas voll hann.
Mache Leit, wo ma sieß gefunn hat, geschmacklose Bemerkunge, iss das bitter. Meer sinn sauer unn reagiere scharf. Zum Thema Geschmack: Wie ma moo esse ware – also vor eewische Zeite –, war die Supp lebsch unn Maggi war aa kenn‘s doo. Ich hann gedenkt: „Ohne Salz kenne na eich die Supp insalze“, hann awwer nix traue se saan, sunscht hätt ich se bei‘m Kellner im Salz leije gehat. So war de Kellner zwar net sauer, awwer die Supp unn ich ware lebsch.
Produktion dieser Seite:
Esther Brenner, Tobias Keßler
Dietmar Klostermann