Alles nei machd de Mai
Abril vòrbei, / schunn is es Mai.“Känn Baurereeschel, trodzdemm kann isch beweise: Es is die rein Wòhrhääd. Awwer die Leid behaubde, das wissde se schunn. Na unn? Se wisse so vill, unn trodzdemm werd’s immer widder gesaad – unn selde genuch druff geheerd.
Bleibd’s hald beim unreine Reim vum Herr Kamp (1829): „Alles neu / macht der Mai“. Besser klingd’s jòò in unserm scheene Pladd: „Alles nei machd de Mai!“Awwer: „Alles nei“? Wär mòò ebbes Neies, bloos: Das soll má glawe? Obwohl má es Gejedääl jedz schunn ahnd unn spädeschdens im Juni wääs?
Egal, selbschd das sinn Kinggerlidzjer, weil: „Alles nei“– oweiowei! Was isch die ledschd Zeid Neies geheerd hann, dòò hädd isch ofd gäär druff vázischd. Wenn heid gefròòd werd „Was gebbd’s Neies?“, passd forr misch beschdens e uraldi Andword, wo bissje aus dá Mode kumm is: „Es gebbd nix Neies; es Alde werd gefliggd!“Wer wääs, zu was es gudd wär!
Was soll má‘n erwaade vum Neie, wo de Mai machd? „Die Seel frisch unn frei“, wie’s im Lied weider gehd? Scheen wär’s – wo Depressione, minnischens awwer die Flemm, normal sinn.
Debei behaubd e anneres Mailied: „Der lustige Mai, der kommd herangerauschet!“Lusdisch? Erinnerd misch an „furschbaa lusdische“Fòòzbagge im Fernsehn: Känn Spur „lusdisch“, awwer umso mehr „furschbaa“, wenischdens, solang isch knaadschisch bin unn zum Meggere uffgeleed.
„Der Mai ist gekommen, die Bäume schlagen aus, / da bleibe, wer Lust hat, mit Sorgen zu Haus.“Solle nidd im Momend ach die dehämm bleiwe, wo dòòzu känn Luschd hann? Das mid de Sòrje stimmd dann widder, awwer Sòrje muss má sisch doch wohl ach dann mache, wem’má nidd dehämm bleibd, odder? „Wie die Wolken dort wandern am himmlischen Zelt / so steht auch mir der Sinn in die weite, weite Welt.“Unn wohin dòò? Uns langd im Momend de Wald, wo wenisch Leid sinn. Die weid Weld iwwerlosse má freiwillisch de Wolge.
Dass die forr uns trodzdemm zu ebbes gudd wäre: Sie kinnde doch beim Wannere iwwer unser Gärde, Felder, Wiese, Wälder nòò all de truggene Jòhre ach endlisch genuch Rään dòòlosse. Am liebschde naachds, wem’má sowieso nidd vòr’s Loch derf, das wär aach nidd vákehrd. Gäb’s dann noch e Sord Rään, wo deforr sòrschd, dass in denne Zeide die Menscheseele nidd vátruggele, wär das nidd scheen? Dann dirfd de Mai ruisch rausche, lusdisch sinn unn alles nei unn annerschd mache, nadiirlisch besser. Awwer jeder annere Monad aach!