Kinner, Narre, Wòhrhääd
Nicht immer ist es leicht zu erkennen, ob jemand auch die Wahrheit sagt, findet unser Mundart-Kolumnist.
Nòò Jóhrzehnde hann isch grad e frescher Spruch widder geheerd, wo mei Oma in de 1950er gäär gesaad had: Saa me Debb, dass á e Debb is – unn er glaabd's nidd. Heid missd se nadiirlisch dezu saan: Saa rá Debbin, dass se e Debbin is – usw. Awwer so weid waa dòòmòls de Fordschridd noch nidd. Unn isch selwer – heid? Erzòh zu me brave Bub, zaad besaid saan isch so deiwelische Ausdrigg sowiso nie. Schunn gaanidd jedz, wo`s so „empfindsam“zugehd unn sisch all Weld iwwertrumbd, wer friedlischer, heeflischer, sanfdmiidischer, ehrlischer unn gereschder is. Nää, isch zidiere bloos die Oma, die had hald in wenischer feinfihlische Zeide gelääbd, unn deshalb waa ihr Spròòch rusdikal unn manschmòò bissje grobb. Awwer deidlisch, nimmand mussd rädsle, wie's gemännd sinn kinnd.
Trodzdemm: Niddemòls der ihr Sprisch hann all immer gestimmd. Z.B.: Kinner unn Narre saan die Wòhrhääd. Kinner, Narre? Also unbedaafd Naive? Gewiss, im'me
Andersen-Märsche saad e Kind die ungeschminkd Wòhrhääd: De Kaiser is naggisch! Sei präschdische Klääder, wo'm Gauner forr deires Geld uffschwädze, gebbd's gaanidd. Dääd má heid so e Wòhrhääd z.B. de Inflünser (Influencer saan isch gradselääds nidd) um die Ohre haue, wo Leid deirer Dregg uffschwädze, was gäb das e Zòòres! Awwer wo soll heid e Kind so ebbes rufe kinne unn ach geheerd genn?
Unn Narre? Dòò is aach nidd ääner wie de annere. Fasenaachdsnarre: Normale Leid unn zur Abwechslung bissje Spass. Audonarre: Was die im Audo saan, zum Gligg heerd má`s nidd. Hofnarre sellemòls: Profis, ofd mid meh Vástand als ihr Firschde, die zähle also nidd. Unn e angeblisch tybbischer Narr wie de Till Eilespischel: Der is nidd naiv, nedd, ehrlisch; der Flabbes is grob unn gefährlisch unn machd heegschens mòl schadefroh.
Nidd nur zu demm passd ehjer e annerer Spruch vun dá Oma: E halwer Narr is schlimmer wie e ganser. Unn schunn falld bei mir de Grosche: Selbschd me Narr, wo e gudder Indrugg machd: Trau em nidd weider, als wie de ne sischd.
Unn Halbnarre, wo so mache, als ob, trau am beschde nie! Denk immer an de Wolf, der had eerschd Kreid unn dann die Geisjer gefress.
Awwer selbschd wenn's mòò vòrkummd, dass Narre die Wòhrhääd saan – de Umkehrschluss, ebbes wär wòhr, nur weil's e Narr (ofd genuch e Halbnarr) saad, stimmd gaanidd. Beispiele wissd isch noch unn noch.
Bestimmd hann ach ehrlische schlaue Leid ihr Guddes. Bloos – finne missd má se hald.
Peter Eckert schreibt in Saarbrigger Platt.