Esse „fa so“
Empfänge haben eines gemeinsam, findet Mundart-Kolumnist Günther Hussong. Es gibt kostenloses Essen und mittelmäßige Reden.
De Januar geht seim Enn entgää. Das iss eenesdääls schad: meer Saarlänner sinn doo viel gesprächischer wie sunscht. Die eerschte Daa im Johr begrieße ma uns net nur met „Unn?“, meer hänge sogar noch „Hanner`s gut angefang?“hinnedran. Annererseits sinn jetzt die Neijohrsempfäng vorbei. Bis zu de Heringsesse an Aschermittwuch muss ma Esse unn Getränke selbscht bezahle. Eerscht dann kried ma widder ebbes fa nix. Ma muss nur zuheere, wie eenie Bartei iwwer alle annere schellt. Die meischte Neijohrsempfäng sinn fa Leit met „Peschtcher“. Unner denne gebt`s „Profis“, die misse als dreimoo am Daa hin unn komme ooweds vollgestoppt met kaltem odder warmem Biffet unn Sekt heem. Deswää sinn viel fett wie e Otter. E bissje Beweeschung hann die nur, well se immer dabber uff`s Klo renne, wann die Sternsinger Spende sammele komme. Ich bin froh, dass ich net all kenne, wo ich net leide kennt, wann ich se kenne däät. Was sich nämlich e paar vun denne Krallemacher vormache, macht ne so schnell kenner noo.
Am Anfang vezehle die „Hauptschte“, was se im alte Johr geleischt hann. Was se sich alles geleischt hann, fallt unner de Disch – die Redd däät sunscht viel zu lang dauere. Sie vespreche, dass im neije Johr alles besser werd – ma misst halt dran glaawe. Eischentlich breischte die nur ehr Redd vum vorische Johr abseschreiwe. Das däät noch net emoo jemand merke, well sowieso nimmand zuhorscht. Meer sinn kleene Nummere, wo sich „fa so“– awwer bestimmt net „omsunscht“angascheere, liewer wie große Nulle. Sie hann aa de Vordääl, dass se bei Empfäng kenn Redde vun meh wie`rer Stunn aushalle misse. Im Fernseh sinn Iwwertraachunge vun Neijohrsempfäng praktischer: Wann e Knebbdreher eener Knobb noo`m annere bringt, kann ma de Knobb dricke statt am Rädche se drehe unn hat vum Empfang kenn Empfang meh. Eemoo war ich uff e Neijohrsempfang ingelaad. Ich hann uff de Lauer gelää, fa so nah wie meeschlich am Biffet se sinn. Normal werr ich joo bei jedem Dinner dicker. Wann ma abnemme will, däärf ma halt nur Appetit uff das hann, was ma net gääre esst, Awwer sellemools hann uffeme Disch met de Greeß vumme Teewaan nur e paar Häppcher gelää – devor hat schun e riese Schlang vun Leit gestann. Ich hann ans Gedicht vum Schiller aus de „Glock“denke misse: „De Wahn ist korz, die Rei iss lang“. Bevor ich vorne war, ware die Häppcher schun all all – das war wärklich kenn „Happy End“.