Mid Umfròòe ausgefròòd!
Allewei heerd unn lääs mer, was irjendwoo innrer Umfròò gefròòd genn iss. Friejer hann se jò uff der Schdròòs geschdann unn middem Dseddel alles uffgeschrieb. Heid gebbd das middem Dellefoon odder middem Indernedd gemach. Dò iss sooe Dseijer unn denne brauschschde nuur nò linggs odder reschds dse dsiehe: Schwubbdiwwubb haschde aan der Umfròò midgemach unn dei Määnung gesaad. Mer fròòd sisch, woofier die ganse Umfròòe gudd sinn solle! Unn iwwerhaubd: All sinn se fier de Daadeschudds, awwer wann ääner irjendwoo ebbes fròòd, saad jee
Unser Mundart-Kolumnist fragt sich, wofür die ganzen Umfragen, die es heutzutage gibt, eigentlich gut sein sollen. der sei Määnung. Verriggde Weld! Bei mansche Umfròòe gebbds die Andworde gleisch dedsuu. Das heischd uff Englisch „Mulldibell dscheus“. Dò breischd mer nuur noch e Greidsje fier die Andword se mache unn schunn iss gudd. Mansche saan, se glaawe nuur denne Umfròòe, die woo se selwer gefälschd hädde. Soo odder soo ähnlisch hadd mò ääner gesaad. Kannschde mò siehn: Uff niggs kann mer sisch heidsedaachs verlasse.
Was iss die beschde Dsahnpaschda? Wer hadd es meischde Geld? Woo kammer am billischde innkaafe? Was helfd dirregd geesche Fuuspils? Wolle die Leid liewer aans Meer odder in die Berje fahre? Elään schummò sooe Fròò iss jò koomisch. Isch bleib meischd deliebschd dehemm. Awwer wann das nidd gefròòd gebbd, muschd de disch dswischem Meer unn de Berje endscheide, aach wann de gaar nidd hin willschd. Unn dann kummds raus: 78 Broddsend fahre liewer aans Meer. Die ääne saan: Ei, wann dòò all hinfahre, danne mache mier das aach. Unn annere dengge sisch: Woo allegaar hinfahre, fahre mier nimmeh hin! Was bassierd: Die gans Umfròò iss weesche der Umfròò im Äämer. Niggs wie Huddel!
Es gebbd aach Umfròòe, die sinn gaar kää Umfròòe. Misch hadd ääner aangeruuf unn umgefròòd, ob isch e Lääwensversischerung fier wischdisch halle. „Ei jò nää!“, hann isch gesaad. Dò hadder druff gemennd, ei wann das soo wäär, dò hädder e dolles Aangebood, billisch unn gudd! Der wolld gaar niggs umfròòe, der wolld nuur sei Lääwensversicherung verkaafe. Unn schderwe duuschde dòòdemid droddsdemm. Dò schliesd mer jò besser e Schderweversischerung ab, als wie es Lääwe se versischere, woo mer genau wääs, dass dò aach e groos Rissiggo debei iss.
Sahneschdiggsche vun alle Umfròòe iss jò die Sunndaachsfròò: „Wann näägschde Sunndaach Bundesdaachswahl wäär…“Niggs bleibd gehääm! Mer wääs schunn vòòrhäär, was unn wie die Leid wähle. Muschd heidsedaachs jò nuur fròòe!
Das neue Buch „Der Dichter und sein virtueller Sohn“von Georg Fox vereint hochdeutsche Kurzgeschichten und die Mundarttexte der letzten Jahre. Zahlreiche Aquarelle aus der Landeshauptstadt sind veröffentlicht in seinem kürzlich erschienenen Buch: „Ein Stück Saarbrücker Glück“, Edition Bucherbach.