D’Neigschmegde vom Neckartal

Letschdens han i mi mit meine Kollega über Badner ond Schwoba onderhalda. Mir send hald älle so am Middagsdisch gsessa ond hen gveschpert, no sait oine vo meine Kollegina aus NRW im volla Ernscht: „Also ich kann ja badisch sowieso nicht vom Schwäbischen unterscheiden“. I hau mi in dem Moment ganz hälinga gfrogt, was die do für an absoluda Käsbäbb nausschwetzt. Dia Frau isch fei koi Domme. Aber des was se do von sich gebba hot, hot mi doch a bissle dra zweifla lassa. Selbscht wenn ma vom letschda Flegga en Hinterdupfinga kommt, no nia Schwäbisch oder Badisch ghert hot und sei ganzes Leaba lang Hochdeitsch schwetzt – Badisch ond Schwäbisch send zwoi onderschiedliche Welta. Drbei sott ses eigentlich wissa! Mei Kollegin hot schließlich schomol em badischa Markdorf gschafft und isch jetzt im schwäbischa Friedrichshafa stationiert.

Mei Kolleg aus Meersburg hot no gmoint, dass des badisch dohonna andersch isch als en Freiburg zom Beischpiel. Do schwetzed se halt melodischer. Mei andrer Kolleg hot mer versichert, dass se sogar en Hagnau nommol andersch schwetzed als direkt drneba en Immastaad. De dritt Kollegin hot glei mit em Schwäbischa en Langenarga ahgfanga. Jetzt bin au i a bissle duranander. I glaub i mach mol an dreiwöchiga Road-Trip durch da Bodaseekreis. No wois i was Sach isch – so als Neigschmegde vom Neckartal.

FOTO: DPA Empfehlenswerte Lektüre: Schwäbisch für Neigschmegde.