Schwäbische Zeitung (Laupheim)
Bätschnasse Schwendier
Liebe Leser weit und breit, Schwendamer Narrazunft isch bereit.
Dia letztda Woch stardat heit, s´Brunnaweible und d´r Käppelespudl sich scho freit.
Heit sammer da ganza Dag in Schwende los, dia Freid isch bei alle groß. Scho Jahre lang des gleiche Spiel – stardat mir da Glompiga Doschdig mit ma subber G’fiehl.
Kindergäda in d´r Gmoind send unser erschdes Ziel – alle Kender send scho ganz mobil. Denn do wird g´sunga, danzad und g´juckt, do dand alle mit – wia verruckt.
Anschließend wird dann d´r Schultes seim Amt enthoba – hockat bis Aschermittwoch nemma auf em Thron doba. En g’cheider Ausstand muss scho sei, drum läd er uns noch no zum Mittagassa ei.
Im Anschluss goht´s dann weiter durch Schwende – bis mir landet bei d´r Melli – im Sportheim am Ende.
Mit Kaffee und Kucha goht´s do los bis am Obend die Fasnetsparty stardat famos.
Luschdig goht´s do noch no rond, do verbringat mir no a paar g´sellige Stond.
A paar von uns guggat am Freidig beim Tobi in d´r Tagespflege vorbei – dia Leidla freiad sich alleweil. Am Oband fährt d´r Bus dann in Richtung „Kuhhausa“– do lässt ma uns dieses Johr beim Nachtomzug sausa.
„Dorffasnet en Schwende“– am Samsdig isch dann soweit, alle machet sich mit viel Heiterkeit bereit.
D´r Käppelespudl und s´Brunnaweible treibat´s au am Sonndig bunt, verbringt in Äpfinga beim Omzug a paar närrische Stond.
Am Rosamedig und Fasnetsdienschdig goht´s direkt weiter, alle sind emmer noch ganz heiter. Am Bronna wird am Diensdigobend dann no g´heilat – Bevor dann de nächste Dag alle auf em Sofa verweilat.
Aschermittwoch – des isch Pflicht – goht´s in Kirch und anschließend send dia Kässptza herg´richt. Bis do na wünschat mir eich no a tolla närrischa Zeit Grüßat mit 3 x Pudl – bätschnass alle Leit.