Feachtas nua faoi bhaol an Bhreatimeachta don Ghaeltacht

Tá Údarás na Gaeltachta ag pleanáil sraith comhdhálacha chun cabhrú le comhlachtaí a fháil réidh don Bhreatimeacht.

Dúirt an Príomhfheidhmeannach Micheál Ó hÉanaigh le Seachtain go bhfuil go leor comhlachtaí Gaeltachta a easpórtálann earraí go dtí an Bhreatain agus go Tuaisceart Éireann buartha faoina dtarlóidh nuair a fhágann an Ríocht Aontaithe an tAontas Eorpach.

Sheol sé an tionscnamh Bí Réidh chun cabhrú leo.

Bhí an Taoiseach Leo Varadkar i bPáras inné le haghaidh cruinnithe le hUachtarán na Fraince Emmanuel Macron faoin mBreatimeacht agus an socrú is fearr a fháil d’Éirinn.

Comhdhálacha

Suas síos cósta an iarthair in Éirinn — i bpobail Ghaeltachta — d’fhéadfadh torthaí fadréimseacha teacht as cainteanna dá leithéid.

“Tá muid ag beartú comhdhálacha faoin mBreatimeacht i chuile cheantar Gaeltachta ina gcabhraíonn muid le comhlachtaí a easpórtálann go dtí an Bhreatain,” a dúirt Ó hÉanaigh.

“Tá an-spéis againn cloisteáil ó aon chomhlacht a bhfuil spéis acu sa mBreatimeacht agus an méid a d’fhéadfadh tarlú.

“Tá an-imní ar dhaoine faoi ach baineann sé sin leis an easpa eolais faoin méid a tharlóidh anois.

“Is fadhb é an ráta malairte airgeadra faoi láthair leis an bpunt lag agus an euro láidir ach tharla sé sin cheana mar sin ní tada nua é sin.”

Dúirt sé go raibh an tÚdarás i dteagmháil le roinnt comhlachtaí cheana féin agus go bhfuil comhlacht amháin i bPáirc Ghnó Ghaoth Dobhair in iarthar Dhún na nGall tar éis a rá go bhfanfaidh siad ann go fadtéarmach.

Fostaíonn Rapid Action Packaging — ar a dtugtar RAP — 180 duine agus d’infheistigh siad in innealra nua ansin chun táirgí pacáistithe bia a tháirgeadh do mhargadh na Breataine go príomha.

“Tá siad tar éis tiomantas a thabhairt don todhchaí atá go maith do Ghaeltacht Ghaoth Dobhair,” a dúirt Ó hÉanaigh.

Dúirt Donncha Ó Baoill, Oifigeach Forbartha Údarás na Gaeltachta, go mbeidh seimineáir an Bhreatimeachta ar bun roimh mhí na Nollag.

Dúirt sé go bhfuil Údarás na Gaeltachta ag obair le Fiontraíocht Éireann ar an scéim Bí Réidh agus is féidir cur isteach ar dheontais chomhairleacha chun íoc as 50% de na costais atá ar ullmhú don Bhreatimeacht.

Measúnú

Roimhe sin, déantar measúnú ar an gcomhlacht chun a chinneadh céard air ar cheart dóibh díriú, ar nós cúrsaí airgeadais nó bainistíochta.

Dúirt sé gurb é an rud is measa faoi ná an éiginnteacht ach go gcaithfear ullmhú don mhéid a d’fhéadfadh tarlú nuair a fhágann an Bhreatain ar an 1 Aibreán 2019.

Dúirt Ó hÉanaigh go bhfuil an tionscnamh Bí Réidh ag cabhrú le comhlachtaí margaí nua a aimsiú san Aontas Eorpach freisin.