Blood Country
Seet deh again, it’s blood!
Yuh look pon di news, it’s blood!
TV itta a run wid blood!
Newspaper write up inna blood!
Dem seh di word is love
But the work is blood,
Boy 13 inna blood!
All di madda dem a scream, no love!
All di caring an di hug, dem a tugs
All the families a cry, man a die,
Caaw man nuh tek death from nuh guy.
When yuh tink it’s peace, a more grief,
Man a fall pon di street like leaf
When tink it’s calm, more storm,
In di middle a di night more gawn
Seet deh again, more death!
It deh-deh pon di news like heck!
Guy a sen death threat
Have girlfriend a fret
Man hear bout it anna step
Man a call man bluff have nedda man a puff,
Man steppin pon di cut wid machine gun up
See deh again more grief,
When yuh tink it’s peace, zinc fence itta leak,
Itaa drip down red, mom a hol har head,
When you think a di end more dead
New names pon di fence
Cause one a tek him revenge
Numbers write pon di wall
Fi all di belly ache weh a gwaan!
If you look pon a man, iz blood!
If you walk like a dawg, graveyard!
Yeah one more name inna blood,
While di minister a shout fi di love
One more death have many a sweat,
New families a fret,
Some send death threat
A guy hear it anna step.
Seet deh again, more blood!