FLOW have nerve a raise price

IT LOOK like seh Garfield Sinclair lik im head. Im a di man in charge a FLOW Jamaica. Im no see seh di bigger boss dem fi Liberty Global, weh own FLOW, a gi im basket fi carry water? Seh dem waan mek more money offa wi. Di amount a customer weh a bawl bout FLOW bad service! An Liberty Global coulda a set fi wi, a plan fi raise price? No sah! Nutten couldn’t go so.

Mek mi tek dat back. Nutten shouldn’t go so. But dem have di handle an wi have di blade. So dem can do anyting dem waan. An nobody cyaan do nutten bout it. Yes, wi can switch to Digicel. Ihih? Oonu no hear seh Digicel owe so much money dem a look money fi borrow fi pay off di money dem owe? Debt top a debt. Digicel cyaan help demself, much more wi. Dem a raise fi dem price to. Watch out! No better pork; no better barrel.

Mi waan know wa Office of Utilities Regulation (OUR) a do bout FLOW an Digicel. An by di way, mi no work fi OUR. Mi tired fi people a email mi a complain bout FLOW an Digicel. All mi can do a write bout it. Oonu fi email OUR. An call dem. An carry on bad. Oonu fi go demonstrate outside a OUR office. Mek dem know seh oonu serious. Oonu waan justice!

Hear wa smaddy email an tell mi last week. Im seh FLOW gi im bout 2 week notice seh dem a go raise dem phone rate from $2.99 to $3.99. Digicel gi im 2 day notice seh dem a go raise fi dem rate from $2.95 to $3.95. Oonu see seh FLOW an Digicel a sing di same Sankey!

MI NO SORRY FI DEM

Den ascorden to one Gleaner article weh publish pon May 17, ‘FLOW Jamaica hikes cable rates amid losses’. FLOW lost 533 million dollar fi di first three month a disya year. Mi no know a weh dem go put down dat deh whole heap a money careless mek dem go lost di whole a it. Mi no sorry fi dem. A wi mi sorry fa. FLOW a depend pon wi fi gi dem back all a di money weh dem lost. Anyting coulda go so? A no wi response.

Mek mi tell oonu bout fi mi FLOW cable service. Mi cyaan even get TVJ! Most a di pro- gramme dem mi waan watch off di air. Yu see all Stephen Colbert show. Dat a one wicked comedy show. A pure politics im deal wid. When im done wid di poppyshow weh a gwaan eena Merica, yu weak. Talk bout tek bad tings mek joke! Dat deh channel, 123, gawn. Mi ha fi a wait so til next morning fi ketch Colbert pon di Internet.

An a no like seh FLOW a cut dem price fi mek up fi all a di channel dem weh gawn. Dem a raise di price. Dem no ha no conscience. John Crow nyam it out. So now, wi ha fi go pay more fi less? If FLOW tink seh dem a lost money now, mek dem wait so til wi go pon strike an stop buy dem bandooloo cable service. A den dem a go lost money. Mi can get TVJ fi nutten. Mek FLOW gweh! Garry Sinclair better tell di higher heads seh wi tired a di advantage tecking. FLOW ha fi do better dan dis. Or wi go a block dem up!

It luk laik se Garfield Sinclair lik im ed. Im a di man in chaaj a FLOW Jamaica. Im no si se di biga baas dem fi Liberty Global, we uon FLOW, a gi im baaskit fi kyari waata? Se dem waahn mek muor moni aafa wi. Di amount a kostama we a baal bout FLOW bad sorvis! An Liberty Global kuda a set fi wi, a plan fi riez prais? Nuo sa! Notn kudn go so.

Mek mi tek dat bak. Notn shudn go so. Bot dem av di angl an wi av di blied. So dem kyahn du eniting dem waahn. An nobadi kyaahn du notn bout it. Yes, wi kyahn swich tu Digicel. Ihn-ihn? Unu no ier se Digicel uo so moch moni, dem a luk moni fi bara fi pie aaf di moni dem uo? Det tap a det. Digicel kyaahn elp demself, moch muor wi. Dem a riez fi dem prais tu. Wach out! No beta puok; no beta baril.

Mi waahn nuo wa Office of Utilities Regulation (OUR) a du bout FLOW an Digicel. An bai di wie, mi no wok fi di OUR. Mi taiyad fi piipl a iimiel mi a komplien bout FLOW an Digicel. Aal mi kyahn du a rait bout it. Unu fi iimiel OUR. An kaal dem. An kyari aan bad. Unu fi go demanschriet outsaid a OUR afis. Mek dem nuo se unu siiriyos. Unu waahn jostis!

Ier wa smadi iimiel an tel mi laas wiik. Im se FLOW gi im bout 2 wiik notis se dem a go riez dem fuon riet from $2.99 to $3.99. Digicel gi im 2 die notis se dem a go riez fi dem riet fram $2.95 tu $3.95. Unu si se FLOW an Digicel a sing di siem Sankey!

MI NO SARI FI DEM

Den azkaadn tu wan Gleaner aatikl we poblish pan Mie 17, ‘FLOW Jamaica hikes cable rates amid losses’. FLOW laas 533 milyan dala fi di fos chrii mont a disya ier. Mi no nuo a we dem go put dong dat de uol iip a moni kielis mek dem go laas di uol a it. Mi no sari fi dem. A wi mi sari fa. FLOW a dipen pan wi fi gi dem bak aal a di moni we dem laas. Enting kuda go so? A no wi rispans.

Mek mi tel unu bout fi mi FLOW kiebl sorvis. Mi kyaahn iivn get TVJ! Muos a di pruogram dem mi waahn wach aaf di ier. Yu si aal Stephen Colbert shuo. Dat a wan wikid kamidi shuo. A pyuur palitiks im diil wid. Wen im don wid di papishuo we a gwaahn iina Merika, yu wiik. Taak bout tek bad tings mek juok! Dat de chanel, 123, gaan. Mi a fi a wiet so til neks maanin fi kech Colbert shuo pan di Intanet.

An a no laik se FLOW a kot dem prais fi mek op fi aal a di chanel dem we gaan. Dem a riez di prais. Dem no a no kanshens. Jangkro nyam it out. So nou, wi a fi go pie muor fi les? If FLOW tingk se dem a laas moni nou, mek dem wiet so til wi go pan schraik an stap bai dem banduulu kiebl sorvis. A den dem a go laas moni. Mi kyan get TVJ fi notn. Mek FLOW gwe! Garry Sinclair beta tel di aiya edz se wi taiyad a di advaantij tekin. FLOW a fi du beta dan dis. Aar wi a go blak dem op!