Mark a di Beast deh pon wi

CHAKA-CHAKA SPELLING

DIS YA prosperity Govament a go mek prophecy fulfil pon wi. Bible did warn wi. Revelation Chapter 13, Verse 17, fi mi New Jamaican Version. “No man, woman or pikni nah go able buy or sell if dem no got di mark, di name or di number a di beast stamp pon dem.” A who a di beast?

Ascorden to Revelation, a two beast. One come from out a sea. Im have seven head an ten horn. An 10 crown. Di next beast come out a ground. Im have ongle two horn. Fi im work a fi big up di first beast. Bible call dis ya beast di false prophet. Im force di people dem fi mek a image fi di first beast. If yu no bow down an worship di image, dem kill yu. An dah beast deh force all a di people dem fi get di mark a di first beast inna dem right hand or pon dem forehead.

Mi a no no fundamentalist Christian. But dis ya national ID law weh Govament a shoob on pon wi! It mek mi a draw mi Bible. An mi a consider. Next ting mi start preach bout 666 an 144,000 an di Great Controversy. An a deh so it done. Mi gone right back a mi Adventist roots. Jah know. Oonoo no know bout dem deh number? Oonoo fi listen Bob Marley: “Revelation reveals di truth. Revelation!”

TEK TIME TALK TO WI!

A money Govament a run down mek dem a hustle fi pass di national ID law. InterAmerican Development Bank (IDB) a go lend dem US$68 million fi pay fi di ID card set up. Lend, no gi! Di bank can’t lend govament no money if no ID law no pass. IDB a go keep meetin eena December fi decide pon di loan. An if Govament no ketch dat deh meetin, dem ha fi go wait one whole-a year fi IDB new budget fi get di money. Wa mek Govament no want wait an tek time talk to wi bout di new system? Dis ya new ID card a one serious ting. A no ordinary ID like driver’s licence. It a go have di whole-a yu personal an private business. Yu fingerprint an picture a yu eyeball eena govament computer. An who a go look after all a dat de information fi stop tief from tek it weh?

Pon top a dat, me want know how di IDB money a go spend. A who a go mek money offa di ID card dem? How much a di money a go go right back a foreign? How much a go tan ya? Govament know how fi mek dem ya high-tech ID card? Dem a go pay fi dem through dem nose hole.

Den if yu no got di ID card, yu nah go able get no service from govament. An dem a go tax yu! Up tu $100,000! A no no joke sinting. Governor general an prime minister seh dem a Adventist. An dem no see seh di new ID card a di Mark a di Beast? Wi ha fi fight gainst dis ya judgement.

PRAPA-PRAPA SPELIN

Dis ya praasperiti govament a go mek prafisi fulfil pan wi. Baibl did waan wi. Revelation Chapta 13, Vors waan fi mi Nyuu Jamiekan Vorzhan: “No man, uman ar pikni naa go iebl bai ar sel if dem no gat di maak, di niem ar di nomba a di biis stamp pan dem.” A uu a di biis?

Azkaadn tu Revelation, a tuu biis. Wan kom fram outa sii. Im av sevn ed an ten aan. An ten kroun. Di neks biis kom outa grong. Im av ongl tuu aan. Fi im wok a fi big op di fors biis. Baibl kaal dis ya biis di faals prafit. Im fuos di piipl dem fi mek wan imij fi di fos biis. If yu no bou dong an worship di imij, dem kil yu. An da biis de fuos aal a di piipl dem fi get di maak a di fos biis ina dem rait an ar pan dem farid.

Mi a no no fondamentalis Krischan. Bot dis ya nashinal ID laa we govament a shub aan pan wi! It mek mi a jraa mi Baibl. An mi a kansida. Neks ting mi staat priich bout 666 an 144,000 an di Griet Kanchravasi. An a de so it don. Mi gaan rait bak a mi Adventist ruuts. Jah nuo. Unu no nuo bout dem de nomba? Unu fi lisn Bob Marley: “Revelation reveals di truth. Revelation!”

TEK TAIM TAAK TU WI!

A moni Govament a ron dong mek dem a osl fi paas di nashinal ID laa. Inter-American Development Bank (IDB) a go len dem US$68 milyan fi pie fi di ID kyaad set op. Len, no gi! Di bangk kyaahn len Govament no moni if no ID laa no paas. IDB a go kip miitn iina Disemba fi disaid pan di luon. An if Govament no kech dat de miitin, dem a fi go wiet wan uola yier fi IDB nyuu bojit fi get di moni.

Wa mek Govament no waahn wiet an tek taim taak tu wi bout di nyuu sistim? Dis ya nyuu ID kyaad a wan siiriyos ting. A no aadineri ID laik jraivaz laisn. It a go av di uola yu porsnal an pravit bizniz. Yu fingaprint an pikcha a yu aibaal iina govament kompyuuta! An uu a go luk aafta aal a dat de infaamieshan fi stop tief fram tek it we?

Pan tap a dat, mii waahn nuo ou di IDB moni a go spen. A uu a go mek moni aafa di ID kyaad dem? Omoch a di moni a go go rait bak a farin? Omoch a go tan ya? Govament nuo ou fi mek dem ya ai-tek ID kyaad? Dem a go pie fi dem chruu dem nuoz uol.

Den if yu no gat di ID kyaad, yu naa go iebl fi get no sorvis fram Govament. An dem a go taks yu! Op tu $100,000! A no no juok sinting! Govana jineral an praim minista se dem a Adventist. An dem no si se di nyuu ID kyaad a di maak a di biis? Wi a fi fait gens dis ya jojment.