Reggae Month mek sense?

CHAKA-CHAKA SPELLING

WHEN MI see di Reggae Month calendar fi 2018, mi head start spin. So much tings chuck up eena di one lickle month! An dem dis a clash, left, right an centre. Mi know seh wi love dancehall clash. But dis a one big mix-up an blender.

When mi look good, mi see seh plenty a di event dem a no directly fi Reggae Month. Dem a gwaan all di time. Tek for instance: Kingston Dub Club pon Sunday; Inna City Mondays; Live Music Tuesdays; Weddy Weddy pon Wenesday; Vinyl Thursdays; Pier Pressure pon Friday; an one new one, Throwback Saturdays up a Devon House. If yu waan, yu can go a dance whole week.

A di Jamaica Reggae Industry Association (JaRIA) put on Reggae Month. An di event dem pon di calendar weh dem response fa a di Trench Town Festival; JaRIA Open University; Reggae Wednesday; Red Rose for Gregory; an di JaRIA Honour Awards. Dat a plenty still.

Mi go pon di JaRIA website fi see if mi coulda find anyting bout wa mek dem did start up Reggae Month. Nutten! Mi tink seh JaRIA did set up eena 2008. Mi did go a di launch. From wat mi member, dem form JaRIA fi run Reggae Month. Back to front! An di first Reggae Month keep eena February 2009.

BORN AN GROW YA

Reggae music born an grow ya. A fi wi owna culture weh wi gi to di world. Wa mek wi a go big up reggae fi ongle one degeh-degeh month?An so much clash! Last week Sunday, mi run up an down like mad ants. Mi go a Bournemouth fi di big tribute weh Irie FM keep fi Bunny Wailer. Ka’bu Ma’at Kheru, programmes manager fi di station, a she organise it. Dat woman have vision.

Last year, Irie FM did honour Jimmy Cliff. A one whole day sinting. Ka’bu start off wid her ‘Running African’ programmme. An it dis run gwaan. Dis ya year, di vibes outa Bournemouth did sweet. Di sea eena di background a mek music a blend een wid di sounds from di speaker box dem. An all di people dem dress up, full a style an fashion. Yu fi see red, green an gold! It was a royal occasion.

Mi lef run go a Institute of Jamaica fi ketch one lickle piece a di Grounation weh di Jamaica

Music Museum put on every Sunday eena Reggae Month. Stephen Golding dida talk bout Marcus Garvey an culture eena di UNIA. By di time mi reach, di talk done an Golding a answer question. So mi go back a Bournemouth. Mi lucky mi ketch Bunny Wailer a perform. Mi beat out.

After 10 Reggae Month, a time fi JaRIA consider if it mek sense. Dem fi spread out di event dem over di whole-a year. Everyting no ha fi cotch up eena February. Dat month shoulda be fi Bob Marley an Dennis Brown. Peter Tosh im done have fi im big bashment eena October at fi him museum at Pulse. An April a fi Bunny Wailer. An di whole a di odder big artist dem woulda get fi dem month. JaRIA a fi wheel an come again.

PRAPA-PRAPA SPELIN

WEN MI si di Reggae Month kalinda fi 2018, mi ed staat spin. So moch tingz chok op iina di wan likl mont! An dem dis a klash, lef, rait an senta. Mi nuo se wi lov daansaal klash. Bot dis a wan big miks-op an blenda.

Wen mi luk gud, mi si se plenti a di event dem a no dairekli fi Reggae Month. Dem a gwaan aal di taim. Tek far instans: Kingston Dub Club pan Sonde; Inna City Mondays; Live Music Tuesdays; Weddy Weddy pan Wensde; Vinyl Thursdays; Pier Pressure pan Fraide; an wan nyuu wan, Throwback Saturdays op a Devon House. If yu waahn, yu kyahn go a daans uol wiik.

A di Jamaica Reggae Industry Association (JaRIA) put aan Reggae Month. An di event dem pan di kalinda we dem rispans fa a di Trench Town Festival; JaRIA Open University; Reggae Wednesday; Red Rose fi Gregory; an di JaRIA Honour Awards. Dat a plenti stil.

Mi go pan di JaRIA websait fi si if mi kuda fain eniting bout wa mek dem did staat op Reggae Month. Notn! Mi tingk se JaRIA did set op iina 2008. Mi did go a di laanch. Fram wat mi memba, dem faam JaRIA fi ron Reggae Month. Bak tu front! An di fos Reggae Month kip iina Febiweri 2009.

BAAN AN GRUO YA

Rege myuuzik baan an gruo ya. A fi wi uona kolcha we wi gi tu di worl. Wa mek wi a go big op rege fi ongl wan dege-dege mont? An so moch klash! Laas wiik Sonde, mi ron op an dong laik mad ans. Mi go a Bournemouth fi di big chribyut we Irie FM kip fi Bunny Wailer. Ka’bu Ma’at Kheru, pruogram manija fi di stieshan, a shi aaganaiz it. Dat uman av vijan.

Laas ier, Irie FM did ana Jimmy Cliff. A wan uol die sinting. Ka’bu staat aaf wid ar ‘Running African’pruogram. An it dis ron gwaan. Dis ya ier, di vaibz outa Bournemouth did swiit. Di sii iina di bakgroun a mek music a blen iin wid di sounz fram di spiika baks dem. An aal di piipl dem jres op, ful a stail an fashin. Yu fi si red, griin an guol! It woz a raayal okiejan.

Mi lef ron go a Institute of Jamaica fi kech wan likl piis a di Grounation we di Jamaica Music Museum put aan evri Sonde iina Reggae Month. Stephen Golding dida taak bout Marcus Garvey an kolcha iina di UNIA. Bai di taim mi riich, di taak don an Golding a ansa kweschan. So mi go bak a Bournemouth. Mi loki mi kech Bunny Wailer a pafaam. Mi biit out.

Aafta 10 Reggae Month, a taim fi JaRIA kansida if it mek sens. Dem fi spred out di event dem uova di uola ier. Evriting no a fi koch op iina Febiweri. Dat mont shuda bi fi Bob Marley an Dennis Brown. Peter Tosh im don av fi im big bashment iina Aktuoba at fi im myuuziyum at Pulse. An Iepril a fi Bunny Wailer. An di uol a di ada big aatis dem wuda get fi dem mont. JaRIA a fi wiil an kom agen.