One-one million full Miss Ramharrack hamper

CHAKA-CHAKA SPELLING

OLD-TIME PEOPLE seh “One-one coco full basket”. Lickle bi lickle, wid nuff-nuff hard work, yu basket wi full up a food an money. Farming a no one easy work. Worse, when a one tough hillside yu a plant up fi mek life. Mi gi nuff thanks fi all a di small farmer dem weh feed wi ina dis ya country. Dem have it hard. An still for all dem gwaan dweet.

Inna dem ya time, certain people no know bout hard work. Dem no business wid no one-one coco. Fi dem basket ha fi full up kwik-kwik. It no matter if dem no even qualify fi carry basket. All dem know, dem suppose fi a live big life. An dem mek sure seh dem hitch on pon smaddy weh can set dem up.

Look pon di slackness a Petrojam! Dat a high science. An mi no mean obeah. Ascorden to di next science, a ongle five kind a fossil fuel deh pon Earth: coal, natural gas, oil, petroleum an liquid petroleum gas. Di scientist dem better go talk to di man dem weh a run tings a Petrojam.

Dem wi find out seh wi have one next fossil fuel eena Jamieka: p**-p**! It can fire up any engine. No matter how it look like seh engine dead, dead, dead, ready fi dash weh, all it tek a one lickle smell a p**-p** an engine start up back hot, hot, hot.

BACKSIDE AN FRONTSIDE

Wat di backside an frontside did a gwaan a Petrojam wid di uman weh dem did put in charge a ‘human resources’? It look like seh she did know how fi use all a fi har human resource fi get fi har big job an set up her fambily. But mi no wrong har to dat. A who gi her di job response fi di autoclaps. Me want know a who did a get wa fi wa?

An look how Andrew Holness im a uphold di slackness! Im a try keep down di scandal. It too late fi dat. But it no too late fi backback an do sinting bout Miss Ramharrack hell of a hamper weh she left Petrojam wid. First dem tell wi seh a nine million an now four milion gone on pon top a dat? Dem tek wi fi eedyat!

Den mi no know weh dem a go wid dat deh foolfool argument seh dem did pay off Miss Ramharrack kwik-kwik becau dem did fraid seh dem woulda ha fi pay nuff more money if she did tek dem go a court. A govament money. Since when Petrojam no want spend off govament money? A hide dem did a hide up di slackness. Dem never want wi know all a wa did a gwaan. But it nah work. An mi feel seh nuff more scandal lef fi come out.

Mi want one Commission of Enquiry set up fi deal wid Petrojam. Every day bockle go a gas station. One day bockle bottom a go drop out. Today a di day!

PRAPA-PRAPA SPELIN

UOL-TAIM PIIPL se “Wan-wan kuoko ful baaskit”. Likl bi likl, wid nof-nof aad wok, yu baaskit wi ful op a fuud an moni. Faamin a no wan iizi wok. Wos wen a wan tof ilsaid yu a plaant op fi mek laif. Mi gi nof tanks fi aal a di sumaal faama dem we fiid wi ina dis ya konchri. Dem av it aad. An stil far aal dem gwaan dwiit.

Ina dem ya taim, sortn piipl no nuo bout aad wok. Dem no bizniz wid no wan-wan kuoko. Fi dem baaskit a fi ful op kwik-kwik. It no mata if dem no iivn kwalifai fi kyari baaskit. Aal dem nuo, dem supuoz fi a liv big laif. An dem mek shuor se dem ich aan pan smadi we kyahn set dem op.

Luk pan di slaknis a Petrojam! Dat a ai saiyans. An mi no miin uobiya. Akzaadn tu di neks saiyans, a ongl faiv kain a fasl fyuil de pan Ort: kuol, nachral gyas, ail, pechruoliyom an likwid pechruoliyom gyas. Di saiyantis dem beta go taak tu di man dem we a ron tings a Petrojam.

Dem wi fain out se wi av wan neks fasl fyuil iina Jamieka: p**-p**! It kyahn faiya op eni injin. No mata ou it luk laik se injin ded, ded, ded, redi fi dash we, aal it tek a wan likl smel a p**-p**. An injin staat op bak at, at, at.

BAKSAID AN FRONTSAID

Wat di baksaid an frontsaid did a gwaan a Petrojam wid di uman we dem did put in chaaj a ‘human resources’? It luk laik se shi did nuo ou fi yuuz aal a fi ar yuuman rizuors fi get fi ar big jab an set op ar fambili. Bot mi no rang ar tu dat. A uu gi ar di jab rispans fi di aataklaps. Mii waahn nuo a uu did a get wa fi wa?

An luk ou Andrew Holness im a opuol di slaknis! Im a chrai kip dong di skayndal. It tuu liet fi dat. Bot it no tuu liet fi bak-bak an du sinting bout Mis Ramharrack el av a ampa we shi lef Petrojam wid. Fos dem tel wi se a nine milyan an nou four milyan gaan aan pan tap a dat? Dem tek wi fi iidyat!

Den mi no nuo we dem a go wid dat de fuul-fuul aagyument se dem did pie aaf Mis Ramharrack kwik-kwik bikaa dem did fried se dem wuda a fi pie nof muor moni if shi did tek dem go a kuort. A govament moni. Sins wen Petrojam no waahn spen aaf govament moni? A aid dem did a aid op di slaknis. Dem neva waahn wi nuo aal a wa did a gwaahn. Bot it naa wok. An mi fiil se nof muor skyandal lef fi kum out. Mi waahn wan Commission of Enquiry set op fi diil wid Petrojam. Evri die bakl go a gyas stieshan. Wan die bakl batam a go jrap out. Tide a di die!