Wa mek di prime minister a bow to di Queen?

LONG TIME now fi wi two political party dem a talk-talk bout seh di Queen a England fi stop rule fi wi country. Di politician dem know seh wi a form fool a gwaan like seh wi independent fi true. Di said same Queen weh gi wi independence a rule wi same way. Wa kind a independence dat? A joke ting! If di politician dem serious, dem ha fi call referendum an mek di whole a wi inna Jamaica decide wi mind if wi want Missis Queen fi gwaan rule wi. A time fi stop talk.

Hear weh Portia Simpson Miller she did seh inna 2012: “I love the queen; she is a beautiful lady and apart from being a beautiful lady, she is a wise lady and a wonderful lady. But I think the time come. As we celebrate our achievements as an independent nation, we now need to complete the circle of independence.” Pure talk! Di People’s National Party never do nutten bout di Queen.

Ascorden to one BBC news report weh come out pon January 6, 2012, dis a wa di head a fi wi country inna England seh bout Sista P big chat: “In response, a Buckingham Palace spokesman said ‘the issue of the Jamaican head of state was entirely a matter for the Jamaican government and people.’” Buckingham Palace tek wi mek poppyshow. Dem know seh fi wi politician dem no serious.

Inna 2016, di Jamaica Labour Party mek big announcement seh dem a go a Parliament wid one bill fi change di Constitution. Dem a go get rid a di Queen an fi her Governor-General. And dem a go bring een one president. Inna fi im ‘Throne Speech’ weh did open Parliament inna 2016, Governor-General Sir Patrick Allen announce di govament plan. Di best joke: dem a go redundant im. All now, govament no do nutten bout change Constitution.

PIT TOILET

Mi nuh understand wa mek Andrew Holness agree fi turn privy councillor. Dis a di first sentence a di oath weh all a di privy councillor dem ha fi tek: “You do swear by Almighty God to be a true and faithful Servant unto the Queen’s Majesty, as one of Her Majesty’s Privy Council.” Inna dis ya time, wen di two political party dem claims seh Jamaica ha fi get rid a di Queen, di prime minister im a go tek oath fi turn servant fi Missis Queen?

See one next part a di oath weh di privy councillor dem ha fi tek: “and will keep secret all Matters committed and revealed unto you, or that shall be treated of secretly in Council.” Di Privy Council come een like lodge. Top secret. Dat a wa di adjective ‘privy’ mean. It come from Latin ‘privatus.’ Private and personal.

Privy have one next meaning. Di noun! Ascorden to Wiktionary: “An outdoor facility for urination and defecation, whether open (latrine) or enclosed (outhouse).” Pit toilet! Missis Queen privy no pretty. An fi wi prime minister better mind sharp how im bow to Missis Queen. All kind a matter weh im no want might a drop pon im head.

PRAPA-PRAPA SPELIN

Lang taim nou fi wi tuu politikal paati dem a taak-taak bout se di Kwiin a Ingglan fi stap ruul fi wi konchri. Di palitishan dem nuo se wi a faam fuul a gwaan laik se wi independent fi chruu. Di sed siem Kwiin we gi wi indipendens a ruul wi siem wie. Wa kain a indipendens dat? A juok ting! If di palitishan dem siiryos, dem a fi kaal refarendom an mek di uol a wi ina Jamieka disaid wi main if wi waan Misis Kwiin fi gwaan ruul wi. A taim fi stap taak.

Ier we Portia Simpson Miller shii did se ina 2012: “I love the queen; she is a beautiful lady and apart from being a beautiful lady, she is a wise lady and a wonderful lady. But I think the time come. As we celebrate our achievements as an independent nation, we now need to complete the circle of independence.” Pyuur taak! Di People’s National Party neva du notn bout di Kwiin.

Azkaadn tu wan BBC nyuuz ripuort we kom out pan Janieri 6, 2012, dis a wa di ed a fi wi konchri ina Ingglan se bout Sista P big chat: “In response, a Buckingham Palace spokesman said ‘the issue of the Jamaican head of state was entirely a matter for the Jamaican government and people.’” Buckingham Palace tek wi mek papishuo. Dem nuo se fi wi palitishan dem no siiryos.

Ina 2016, di Jamaica Labour Party mek big anounsment se dem a go a Paaliment wid wan bil fi chienj di Kanstityuushan. Dem a go get rid a di Kwiin an fi ar Govana-Jinaral. And dem a go bring iin wan prezident. Ina fi im ‘Throne Speech’ we did opn Paaliment ina 2016, Govana-Jinaral Sir Patrick Allen anouns di govament plan. Di bes juok: dem a go ridondant im. Aal nou, govament no du notn bout chienj Kanstityuushan.

PIT TAILIT

Mi no andastan wa mek Andrew Holness agrii fi ton privi kounsla. Dis a di fos sentens a di uot we aal a di privi kounsla dem a fi tek: “You do swear by Almighty God to be a true and faithful Servant unto the Queen’s Majesty, as one of Her Majesty’s Privy Council.” Ina dis ya taim, wen di tuu politikal paati dem kliemz se Jamieka a fi get rid a di Kwiin, di praim minista im a go tek uot fi ton sorvant fi Misis Kwiin?

Si wan neks paat a di uot we di privi kounsla dem a fi tek: “and will keep secret all Matters committed and revealed unto you, or that shall be treated of secretly in Council.” Di Privi Kounsl kom iin laik laj. Tap siikrit. Dat a wa di ajiktiv ‘privi’ miin. It kom fram Latin ‘privatus.’ Pravit an porsnal.

Privi av wan neks miinin. Di noun! Azkaadn tu Wiktionary: “An outdoor facility for urination and defecation, whether open (latrine) or enclosed (outhouse).” Pit tailit! Misis Kwiin privi no priti. An fi wi praim minista beta main shaap ou im bou tu Misis Kwiin. Aal kain a mata we im no waahn maita jrap pan im ed.