Pikni fi test fi see if dem a jacket
CHAKA-CHAKA SPELLING
IT NUH right. Ooman not suppose fi call man name wen shi done know seh a nuh im a di father a fi har pikni. A one wicked-wicked sinting fi ooman gi man jacket. Mi know seh sometime ooman sex more than one man, inna one lickle space a time. An wen shi pregnant, shi nuh directly know a who a di baby father. So shi dis decide har mind fi pick di man weh shi tink wi mind di pikni. It come een like lucky draw. Lucky fi di ooman; not fi di man an di pikni!
Sometime di ooman dem well an know who a di father. Dat nah stop dem from call one next man name. Tanya Stephens a one a fi wi top a top reggae singer an dancehall DJ. Shi know how it go. Shi write one big chune weh shi call “Little White Lie.” One unconscionable ooman a sing dem ya lyrics to har pikni:
“I’m gonna burn in hell, but it’s no sacrifice
Your stability is worth a million lies
I see your daddy in everything you do
And if you could talk,
I bet you’ll talk like him too
But he can’t be your daddy,
I hope you understand
The man who thinks he’s your father
Is a much better man”
Seet deh now! Dem deh Jezebel ooman buy trouble pon demself. An it nuh cheap. Mi feel it fi di man dem weh get ketch. Dat deh lie nuh lickle. An it nuh white. It red same like di length a cloth weh di man would a cuss if im find out seh di pikni a nuh fi im. An a nuh ongle cuss some man would a cuss. Dem wi batter bruise di ooman. Dat nuh right still. Di man dem a fi find one better way fi deal wid di Jezebel dem. Sue dem fi fraud!
DI RIGHTFUL FATHER
MP Heroy Clarke mek one big speech inna Parliament pon November 9. Im seh Jamaica should a pass one law fi test pikni same time dem born, fi find out a who a di rightful father. Nuff-nuff smaddy a fight im down. Man an ooman! Dem nah seh nutten fi defend di poor man dem weh di bad-breed ooman dem force fi mind one next man pikni. All dem a talk bout a di ‘poor’ ooman weh tell lie bout har baby father. Dem sorry fi har becau di man weh shi fool up might a kill har.
Me agree wid di MP. A time fi stop ooman from tell lie bout who a dem baby father. Man have a right fi know fi im rightful pikni. Nuff good-heart man wi look after one next man pikni. But no ooman not suppose fi must an bound no man fi do dat. If a ooman get pregnant fi di ‘wrong’ man, dat a fi har problem. An shi a fi tek di consequence. If di ooman dem know seh dem pikni a go test, dat a di end a di lie an story.
PRAPA-PRAPA SPELIN
It no rait. Uman nat supuoz fi kaal man niem wen shi don nuo se a no im a di faada a fi ar pikni. A wan wikid-wikid sinting fi uman gi man jakit. Mi nuo se somtaim uman seks muor dan wan man, ina wan likl spies a taim. An wen shi prignant, shi no dairekli nuo a uu a di biebi faada. So shi dis disaid ar main fi pik di man we shi tingk wi main di pikni. It kom iin laik loki jraa. Loki fi di uman; nat fi di man an di pikni!
Somtaim di uman dem wel an nuo uu a di faada. Dat naa stap dem fram kaal wan neks man niem. Tanya Stephens a wan a fi wi tap a tap rege singa an daansaal DJ. Shi nuo ou it go. Shi rait wan big chuun we shi kaal “Little White Lie.”
Wan ankanshanebl uman a sing dem ya liriks tu ar pikni:
“I’m gonna burn in hell, but it’s no sacrifice
Your stability is worth a million lies
I see your daddy in everything you do
And if you could talk,
I bet you’ll talk like him too
But he can’t be your daddy,
I hope you understand
The man who thinks he’s your father
Is a much better man”
Siit de nou! Dem de Jezebel uman bai chrobl pan demself. An it no chiip. Mi fiil it fi di man dem we get kech. Dat de lai no likl. An it no wait. It red siem laik di lent a klaat we di man wuda kos if im fain out se di pikni a no fi im. An a no ongl kos som man wuda kos. Dem wi bata bruuz di uman. Dat no rait stil. Di man dem a fi fain wan beta wie fi diil wid di Jezebel dem. Suu dem fi fraad!
DI RAITFUL FAADA
MP Heroy Clarke mek wan big spiich ina Paaliment pan Novemba 9. Im se Jamieka shuda paas wan laa fi tes pikni siem taim dem baan, fi fain out a uu a di raitful faada.
Nof-nof smadi a fait im dong. Man an uman! Dem naa se notn fi difen di puor man dem we di bad-briid uman dem fuors fi main wan neks man pikni. Aal dem a taak bout a di ‘puor’ uman we tel lai bout ar biebi faada. Dem sari fi ar bikaa di man we shi fuul op maita kil ar.
Mii agrii wid di MP. A taim fi stap uman fram tel lai bout uu a dem biebi faada. Man av a rait fi nuo fi im raitful pikni. Nof gudaat man wi luk aafta wan neks man pikni. Bot no uman nat sopuoz fi mos an boun no man fi du dat. If a uman get prignant fi di ‘rang’ man, dat a fi har prablem. An shi a fi tek di kansikwens. If di uman dem nuo se dem pikni a go tes, dat a di en a di lai an stuori.
For an English translation, visit carolynjoycooper.wordpress.com