Slackness pon Nationwide Radio

CHAKA-CHAKA SPELLING

PON FEBRUARY 9, 2024, dis a wa Nationwide Radio post pon fi dem Instagram page: “In public opinion today we ask, ‘ Cindy or Rita?’ Comment below & let us know your thoughts.” Mi couldn’t believe it. Wa kind a question dat? Mi nuh know if a beauty contest, wife-an-matey clash or Quick Pick. Wa mek Nationwide Radio go deh so? Dem nah nuh rispek fi uman. A tek wi turn cheap-cheap entertainment. A so dem desperate fi get people fi listen to dem station? Mi call Nationwide fi aks dem wa mek dem a defend slackness. A no ongle bad word inna dancehall lyrics a slackness. Di Broadcasting Commission supposen fi look inna all kind a slackness.

Mi get through to George Davis. Im a di “Manager News and Current Affairs.” A im response fi public

opinion. Mi aks im if dat a one decent question. An im a try turn it round pon mi, a aks mi wa me tink. Nutten. Im seh di clash all over social media. So Nationwide nah nuh choice fi left dat deh slackness to dem odder one dem? Im seh im woulda send mi one voicenote fi explain imself better. All now mi nuh get it. Mi hope seh a shame im shame. Pon fi dem website, di station post seh “Nationwide News Network will be decent, honest and shall say sorry whenever it gets it wrong.” Dem better seh sorry fi dat deh low-down public opinion question.

“WHO FEELS IT, KNOWS IT”

Instead a stir up ants nest, Nationwide Radio shoulda encourage di public fi read Rita Marley book weh come out eena 2004. She did tell Hettie Jones fi her story an Hettie write it down an fix it up. Di book name No Woman, No Cry: My Life With Bob

Marley. It never easy at all, at all. Ina di chapta, “Who Feels It, Knows It,” Rita talk bout how she did deal wid di whole heap a woman dem weh Bob did have round im: “I tried to train myself to think of Bob as a good loving brother more so than a real husband, and made my peace with the situation. I asked God for help with the things I couldn’t change. Maybe because there were so many women they grew less and less threatening . . .”

It look like seh Cindy bex becau she nuh get nuh big up inna di flim, Bob Marley: One Love. Dat a wa start up di slackness bout ‘ Cindy or Rita?’ Cindy fi member seh she a ongle one a di “so many women” weh Rita Marley done wid long time. Damian Marley did follow back a Shabba Ranks an go pon stage go chant, “My daddy was a bedroom bully.” True word! Di question Nationwide shoulda did aks pon public opinion a nuh “Cindy or Rita?” It shoulda be “Bob Marley: slackness or culture?”

PRAPA-PRAPA SPELIN

Pan Febieri 9, 2024, dis a wa Nationwide Radio puos pan fi dem Instagram piej: “In public opinion today we ask, ‘ Cindy or Rita?’ Comment below & let us know your thoughts.” Mi kudn biliiv it. Wa kain a kweschan dat? Mi no nuo if a byuuti kantes, waif-an-mieti klash ar Quick Pick. Wa mek Nationwide Radio go de so? Dem naa no rispek fi woman. A tek wi ton chiip-chiip entatienment. A so dem desparet fi get piipl fi lisn tu dem stieshan? Mi kaal Nationwide fi aks dem wa mek dem a difen slaknis. A no ongl bad wod ina daansaal liriks a slaknis. Di Broadcasting Commission sopuosn fi luk ina aal kain a slaknis.

Mi get chruu tu George Davis. Im a di “Manager News and Current Affairs.” A im rispans fi public opinion. Mi aks im if dat a wan diistant kweschan. An im a chrai ton it roun pan mi, a aks mi wa mii tingk. Notn. Im se di klash aal uova soshal miidya. So Nationwide naa no chais fi lef dat de slaknis tu dem ada wan dem? Im se im wuda sen mi wan vaisnuot fi eksplien imself beta. Aal nou mi no get it. Mi uop se a shiem im shiem. Pan fi dem websait, di stieshan puos se “Nationwide News Network will be decent, honest and shall say sorry whenever it gets it wrong.” Dem beta se sari fi dat de luodong public opinion kweschan.

“WHO FEELS IT, KNOWS IT”

Insted a stor op ans nes, Nationwide Radio shuda inkorijin di poblik fi riid Rita Marley buk we kom out iina 2004. Shi did tel Hettie Jones fi ar stuori an Hettie rait it dong an fiks it op. Di buk niem No Woman, No Cry: My Life

With Bob Marley. It neva iizi at aal, at aal. Ina di chapta, “Who Feels It, Knows It,” Rita taak bout ou shi did diil wid di uol iip a uman dem we Bob did av roun im: “I tried to train myself to think of Bob as a good loving brother more so than a real husband, and made my peace with the situation. I asked God for help with the things I couldn’t change. Maybe because there were so many women they grew less and less threatening . . .”

It luk laik se Cindy beks bikaa shi no get no big op ina di flim, Bob Marley: One Love. Dat a wa staat op di slaknis bout ‘ Cindy or Rita?’ Cindy fi memba se shi a ongl wan a di “so many women” we Rita Marley don wid lang taim. Damian Marley did fala baka Shabba Ranks an go pan stiej go chaant, “My daddy was a bedroom bully.” Chruu wod! Di kweschan Nationwide shuda did aks pan public

opinion a no “Cindy or Rita?” It shuda bi “Bob Marley: slackness or culture?”

For an English translation, visit https:// carolynjoycooper.wordpress.com/