Isat nah cuss Paula fi now
CHAKA-CHAKA SPELLING
ISAT BUCHANAN must did lik im head. Last year, im mek mistake tek Vybz Kartel lyrics cuss Paula Llewellyn, Director of Public Prosecutions (DPP). Inna “The Menace,” Kartel seh, “Mi too cocky fi ah cooperate wid corporate.” An im gwaan lickle more: “Speaking of cocky, ‘Hey Paula, go s**k a d**k!’” A dat Buchanan go tek up wid im careless self! Im a one a Kartel lawyer an a long time im inna war wid Paula Llewellyn office. Di lawyer dem did a try fi get Kartel phone fi evidence when di case go a Privy Council inna England. Dem did suspect seh police did trouble it.
Dis a wa Buchanan tell Loop News inna November 2020: “The DPP is being very dodgy and shady, and very deliberate in their action to continue to violate the constitutional rights of Adidja Palmer. Despite the attempts of myself and the Queen’s Counsel, we have been unable to get access to the cellphone, which we believe has evidence of tampering.”
Di DPP office gi one long-long answer to Buchanan weh Gleaner put out. Hear weh DPP seh: “As prosecutors, we are bound to operate at a very high ethical standard. We are professionals and have no vested interest in the outcome of any case but we are obliged to use our experience, knowledge of the law and skill to put forward the best available evidence in proof of our case at trial.”
COCK MOUTH KILL COCK
It look like seh di DPP lawyer dem never have di “experience, knowledge of the law and skill” fi deal wid di juror weh did a try fi bribe dem odder one. Di judge should a never keep im pon di jury. Im should a come off. An di trial should a gwaan wid who lef. Or di whole a dem should a tek off a di case. Dat never happen. Lord Lloyd-Jones, weh did read di Privy Council judgment, seh, “Allowing juror X to remain on the jury is fatal to the safety of the conviction which followed. It was an infringement of the appellant’s fundamental right to a fair hearing under the Jamaican Constitution.”
Seet deh! Cock mouth kill cock. A di slackness a di office a di DPP mek di Privy Council turn over Adidja ‘Vybz Kartel’ Palmer, Shawn Campbell, Kahira Jones an Andre St John conviction. It must sweet Isat Buchanan. Im nah cuss Paula Llewellyn fi now. An wi nuh hear nutten from her bout di Privy Council judgment. Wa mek?
PRAPA-PRAPA SPELIN
Isat Buchanan mos did lik im ed. Laas ier, im mek mistiek tek Vybz Kartel liriks kos Paula Llewellyn, Director of Public Prosecutions (DPP). Ina “The Menace,” Kartel se, “Mi too cocky fi ah cooperate wid corporate.” An im gwaan likl muor: “Speaking of cocky, ‘Hey Paula, go s**k a d**k!’” A dat Buchanan go tek op wid im kielis self! Im a wan a Kartel laaya an a lang taim im ina waar wid Paula Llewellyn afis. Di laaya dem did a chrai fi get Kartel fuon fi evidens wen di kies go a Privy Council ina Ingglan. Dem did sospek se poliis did chrobl it.
Dis a wa Buchanan tel Loop News ina Novemba 2020: “The DPP is being very dodgy and shady, and very deliberate in their action to continue to violate the constitutional rights of Adidja Palmer. Despite the attempts of myself and the Queen’s Counsel, we have been unable to get access to the cellphone, which we believe has evidence of tampering.”
Di DPP afis gi wan lang-lang ansa tu Buchanan we Gleaner put out. Ier we DPP se: “As prosecutors, we are bound to operate at a very high ethical standard. We are professionals and have no vested interest in the outcome of any case but we are obliged to use our experience, knowledge of the law and skill to put forward the best available evidence in proof of our case at trial.”
KAK MOUT KIL KAK
It luk laik se di DPP laaya dem neva av di “experience, knowledge of the law and skill” fi diil wid di juuro we did a chrai fi braib dem ada wan. Di joj shuda neva kip im pan di juuri. Im shuda kum aaf. An di chraiyal shuda gwaan wid uu lef. Ar di uol a dem shuda tek aafa di kies. Dat neva apn. Lord Lloyd-Jones, we did riid di Privy Council jojment, se, “Allowing juror X to remain on the jury is fatal to the safety of the conviction which followed. It was an infringement of the appellant’s fundamental right to a fair hearing under the Jamaican Constitution.”
Siit de! Kak mout kil kak. A di slaknis a di afis a di DPP mek di Privy Council ton ova Adidja ‘Vybz Kartel’ Palmer, Shawn Campbell, Kahira Jones an Andre St John kanvikshan. It mos swiit Isat Buchanan. Im naa kos Paula Llewellyn fi nou. An wi no ier notn fram ar bout di Privy Council jojment. Wa mek?
For an English translation, visit https://carolynjoycooper.wordpress.com/