’Till Di Well Run Dry

How di time suh hot? No sah! Woii, how di place suh dry? Beg yuh likkle wata deh ma… Weh yuh seh? None nuh deh deh?

So dem cut off di wata like how dem cut off di light. Mercy Lawd, mi cyaan wash mi clothes much less bade t’night.

Every day mi look to di hills not one drop a rain fi mi wash off mi ‘kin. Mi start fi fret, an’ mi start fi pray “God, it look like yuh mek a mistake ‘Cause mi t’ink is di Sahara mi livin in”.

Which land of wood an’ wata?

Dat nuh really fit wi present state yah man. Di riva dem ah dry up and di tree dem a wilt an’ dead. Not to mention wi hav’ ongle two reservoir dam Weh half full up a dirt an’ silt an’ san’; Di situation is very dread.

Den dem a dig guh far dong inna di ground an still cyaan find much wata.

Wen di wata truck dem come around Mi haffi give God thanks,

But afta mi tun on di kitchen pipe nuh milo tea dat a come out a di tank!

Dat is when it hit mi like a ton a rock stone Dis wata situation in wi country is more serious dan wi know.

All the place dem dat wi get wi wata from All a dem a run low.

Mi read inna di news paypa weh-day dat if wi nuh save up wata an’ use less There may come a day when none at all nuh lef ’!

Even if Big Chief use him gun-butt an’ strike di limestone rock, it will be dry like one ol’ calabash.

Neva again in fi mi life will i sing

“rain rain go away come another day” ‘cause di drought is no joking sin’ting

An’ wen rain decide fi strike, it gone fi stay.

Right now mi so desperate fi wata

Dat mi feel like fi cry miself a riva.

A now mi know weh dem mean by: “Yuh neva miss di wata ‘till di well run dry”.

Suh before tings get from bad to worse Mek mi rashan di likkle weh mi have, Mi have to reduce, reuse and conserve. An’ if rain do happen fi fall at all

I gwine catch it inna mi barrel, drum, tank an’ even mi purse. Even if mi glass get only half full

Mi more dan grateful

Wata is di most valuable resource

An’ every drop is precious.