Father’s dirty deeds found in garbage bin

Dis likkle boy an him fren dem did a play hide-anseek. Somehow him decide fi hide inna him neighbour dem big garbage bin. Him fren dem look fi him an couldn’t find him. Afta dat him come out an run goh ova to him fren dem a laugh how dem couldn’t find him. Di whole a dem excited an a talk to dem one anneda wen one a dem notice a likkle picture a stick on pon him. Wen him tek off di picture di poor likkle boy see seh a him fada a use him face a do di tings dem to one a di oda likkle boy big sista, who live nex to him an him family. In oda words, di likkle boy fada a do di tings dem wid di neighbour dem big dawta, who is 28 years old. Di likkle boy fren dem staat laugh an dat cause him fi staat bawl. Him run weh fram dem guh back a him house a bawl same way, an a shout fi him mada. Him mada ask him wa him a bawl fa an him tell har. Wen she ask fi di picture him couldn’t find it. Suh him an him mada guh out weh him did deh fi di picture.

Dem reach back a him fren dem an him mada sternly ask dem fi di picture. Di whole a dem point pon one an seh a him have di picture. Di mada ask him fi it an him gi it to har. Di mada look pon di picture an den tell di whola dem fi guh home. She also bring home har son.

Di mada watch out di neighbour house till she see di dawta come home. She walk right out deh an widout saying anything she jus shub di picture inna di 28 year old young lady hand. Di dawta look pon di pic an get shocked an run guh inna har house. Di mada walk guh back to har house.

Layta di dawta come ova di mada house an ring di bell. Wen di mada guh a di door di dawta staat bawl an seh she come fi apologize. She explain seh a long time she an di mada husband a do di tings dem, an dat a she first did staat flirt wid di husband an look him. Di mada ask har why she dweet? She seh a simply because she tink him “very sexy” cause him work out an always a jog pass har house. She also seh him neva know she did set up a digital camera fi tek him pic wen dem a do di tings dem, an dat she did print some a di pics dem pon har personal printer.

Anyways, a leggomentz again. Send mi unuh drama dem at ragashanti@tambourineradio.co m. See unuh next Thursday same place ya so inna di STAR. Bless.

Road!!