Peed myself after my girl’s husband caught me in her car

Mi seh dem always seh never ramp with a policeman or solider woman, but dem never warn wi ‘bout security guard. Mi say mi use to cheat with one a mi co-worker, and her man own a security firm.

Regular ting fi wi tief weh from work go motel, but all dis time, neither mi nor she realise seh the man have a tracker on the vehicle.

One day we deh a the hotel and him call her and ask her if she can call him off the office phone because him credit a done, but because she smart, she call the operator and beg her connect the call. We done do wi ting and head back to work nice and easy. She seh she hungry, so mi borrow her car and seh mi a go buy her lunch, but minutes into driving mi notice a car a follow behind me. Mi slow dung and it slow dung too, so mi start feel ‘fraid same time and call di ooman and ask her again if tracker on di car and, once again, she say no.

Shortly after, di car just swing in front a mi and block di car and three man exit with guns. Mi nah guh tell nuh lie, mi p*** up miself same time.

Dem say don’t move and mi ask dem weh mi could a move go, and den dem tell mi say dem get report say di car tief and start threaten mi say dem a go shoot me. Next ting mi know dem drag mi out a di vehicle and fling mi pon mi face a grung. Outta di corner of mi eye, is har man mi see.

CALLING THE GIRL

Mi start plead to him say a mi co-worker car and she just beg mi do har a fava, but him insist say mi is a car tief. Mi end up have to call the girl and she ansa the phone, ‘Yes babes’ and make di situation worse. Let’s just say mi beg it out and di man tek di car from mi and give me a stern warning to leave him wife alone.

Mi end up have to walk go back a work inna mi wet-up pants, shame like dog. Mi did say mi a go leff her while mi a walk go back a di office, but within a few days mi start member how har body good, so wi come up with a new plan. Mi start borrow mi next fren vehicle and leave hers at di office when wi a go duh road.