I slept with the community weirdo

Mi say STAR, mi mek di mistake an’ sleep wid a strange man inna mi community an’ now him a tek set on mi an’ all a mek talk in the presence of mi babyfather.

A desperate mi did desperate why mi do it because mi man refuse to go work. Him wah stay home every day an’ watch mi. Couple months ago, mi did have some business fi take care of and need $8,000 and never know where to turn. Everybody whe mi ask say di pandemic mek dem broke, so mi run out a options. One day mi siddung on mi verandah and see mi neighbour a pass. Him is a likkle weird man whe no one never see with any woman. Him stop and ask how mi face look suh an’ mi tell him a wah a mi problem an’ him tell mi say $8,000 a simple ting fi him give mi, but mi have to do suppen for him. Him promise mi two bottle a wine, too, so out a frustration, mi go over a him yard when no one nah look.

Mi condition mi mind and him give him likkle sumting and take up di wine and come a mi yard wit the money and say a it dat. But mi did wrong, because the same evening mi and mi fren dem on the corner a him dat mi see pass and say ‘Thanks, mi did really like dat yuh hear’ an’ a smile. Mi fren dem ask a what him a talk bout but mi tell lie say a likkle breakfast mi give him.

Mi see him after dat an’ race him up an’ tell him say don’t do dat, an’ him say him a mi side man now and him not going anywhere. Mi wah drop dung because the man nuh nice STAR.

One next time mi and mi boyfriend a walk an’ him bawl out to him an’ ask whe him a walk round wid him wife fah. Is a good ting mi man never take him serious because him know say no woman nuh want him. Now, the man all a come a mi gate come call mi an’ mi nuh know what to do. Him tell mi say him have a bigger food fi mi an’ mi wah take it, but mi fraid because him a get too nuff.