Мәтіні Алина Краснова фото Shutterstock
Киев тұрғындары өз қалаларын негізсіз мақтан тұтпайды. Олар қаланың тарихын жетік біледі және көз тартарлық орындары туралы тоқтаусыз айта беруге дайын.
Саяхатшыны Киевпен таныстыру үшін кәсіби гид болу мүлде шарт емес — бұл міндетті кәдімгі такси жүргізушісі-ақ тамаша атқара алады, жол үстінде ол жолаушыны тарихи оқиғалар туралы хабардар етіп, қала аңыздарын айтып береді және осы тамаша қаламен жақынырақ танысу үшін қайда бару керек екенін сілтеп, екі ауыз сөзбен кеңес береді.
Киевтің керемет жерге орналасқанына, сірә, ешкім де таласа қоймаса керек. Қаланың ең басты визит карточкасы — Украина астанасының байырғы тұрғындары мен қонақтарына көп мыңжылдықтар бойы қуаныш сыйлап, асықпай ағатын айбынды Днепр. Бірден Гогольдің: Днепрдің ортасына дейін ұшып жететін құс кемде-кем, - деген сөздері еске түседі — осы орасан шалқар
өзенге қарап, одан ұшып өтуге батылы жеткен құстардың ерлігіне таң қаласың. Бұдан шамалы уақыт бұрын қаланың билік орындары Өзен вокзалының жанындағы жағалауды жайластырып, ретке келтірді де, ол бірден қалалықтардың сүйікті демалыс орнына айналды. Алаң ортасына орналасқан фонтанды айналып, қажымайтын роллерлер мен скейтерлер ызғытып жүреді. Қаланы ұзақ аралаған туристер ыңғайлы орындықтарда демалып отырады, жағалауды бойлап, ғашық жұптар серуендеп жүреді, ал шағын да жайлы ресторанда таза ауамен рақаттанып және әсем пейзаждарды тамашалап отырып, асықпай кешкі тамақ ішуге болады.
Киевтің тағы бір табиғи көз тартарлық жері — ол, әрине, атақты төбелер. Бұл «жоғары» және «төмен» деген ұғымдар, «солтүстік» немесе «оңтүстік» деген ұғымдарға қарағанда, анағұрлым көп пайдаланылатын әлемдегі санаулы ғана қалалардың бірі. Киевте шолу алаңдары өте көп, солардан қаланың ғажайып көріністері ашылады. Ең әйгілілері — Халықтар Достығы аркасының жанындағы Крещатый паркіндегі алаң, Андреев еңісінен баспалдақпен көтерілуге болатын Қорған тауы, Михайлов монастыріне жақын орналасқан Владимир төбешігі. Айтпақшы, Мария паркінен де керемет көріністер ашылады, ресейлік патшайымдар осында болғанды ұнатқан. Елизаветаның арқасында осында Мария сарайы пайда болды, оның архитекторы — Растрелли. Екатерина II мұнда әскери жаттығуларды жиі ұйымдастырған, ал оны ауыстырған Мария Александровна плацдармды таңдаулы паркке айналдыруды бұйырған.
Киевтің архитектурасы туралы шексіз жаза беруге болады. Украина астанасындағы архитектуралық ескерткіштер тізімінде алғашқылардың бірі болып химералар бейнеленген үй тұр. Қаланың қақ ортасында орналасқан ғимарат үйдің қасбетінен де, ішінен де табуға болатын мүсіндік әшекейлерінің арқасында әйгілі болды. Химералар бейнеленген үй туралы ресми ақпаратты көптеген дереккөздерден оқуға болады. Бұдан басқа, онымен көптеген қала аңыздары байланысты. Жұрттың айтуынша, осындай сән-салтанатты құрылыстың салынуына кәдімгі бәстесу себеп болған. Архитектор Владислав Городецкий құрғатылған батпақтың жағасындағы тік жардың үстіне рекордтық аз уақытта үй салуға бәстеседі. Бәсті жеңген ол үйді үш жылдың ішінде салып бітіреді, жаңашыл технологиялық шешімдерді пайдаланудың арқасында сол үй Банк көшесінде жүз жылдан астам уақыт дін аман тұр.
Киевте болған кезде химералар бейнеленген үйді көргілеріңіз келсе, онда мына бір қызықты ырымды естеріңізге түсіріңіздер: мүсіндердің арасынан кімде-кім қолтырауынды табатын болса, сол адамның қалған өмірінде әрқашан жолы болып отырады екен. Шынайы және ертегілік қыруар жануарлардың ішінен қолтырауынды табу айтарлықтай қиын екенін мойындауға тура келеді, бірақ барынша қызығушылық танытқан саяхатшылар үшін мынаны ескертуге болады: қолтырауындар ұшпайды, сондықтан оның мүсінін төменнен іздеу керек.
Киевтің мәдени көрікті орындары туралы әңгіме Киев-печерск лаврасының аумағында орналасқан Шағын миниатюралар мұражайынсыз толық болмас еді, оның өзі, әрине, сөзсіз айтулы орын болып табылады. Бірақ әңгіме қазір ол туралы емес, ал экспонаттары бүкіл әлемді шарлап шыққан Николай Сядристыйдың ғажайып мұражайы жайында. Біріншіден, автордың өзі — бірегей тұлға. Оның жады, есте сақтау қабілеті ғажап: Николай Сергеевич өзінің кез келген кітабынан үзінділерді жатқа оқи береді — ең бастысы, кітап бетінің нөмірі мен жолын айтса, жетіп жатыр. Оның жұмыстары да бірегей: шаштың арасына қыстырған раушангүл сабағы, иненің көзіндегі алтын түйелер керуені, түйреуіштің ұшына орналастырылған әлемдегі ең кішкентай шахматтар — бұлар мұражайға қойылған экспонаттардың бірен-сараны ғана. Көрме залы біршама шағын, бірақ әрбір микроскопиялық жұмыстың әсемдігі мен автордың көп жылдық еңбегін ескергенде, іштей оның алдында қалпағыңды шешкің келеді.