Ислам Сүлеймен, 10-сынып оқушысы
Мен «саяхаттау» деген ұғымды өзге мәдениеттермен танысу, жеке өзің үшін жаңалықтар ашу деп білемін. Меніңше, әр саяхатшының өзі ұнатқан қаласы болады.
Мысалы, биылғы жылдың ақпан айында мен Хайнань аралына сапар шеккен едім. Қыстың ұйтқыған боранында елордамыздан аттанған ұшағымыз күн шыққан кезде Санья қаласына қонды. Демалыс барысында біздің отбасымыз теңіз суына шомылып, құмды жағажайда тынықты. Содан кейін мен атақты Наньшань ғибадатхана кешені мен «Romance park» супершоуын көріп қайттым. Келесі күндері акула және жылан фермаларына бардым. Бір айта кетерлігі, сол жерде әбжыланның қаны мен акуланың майынан дәм татуға болады екен. Әсем тропикалық ормандар көздің жауын алса, тап-таза саф ауасы денсаулықты біршама нығайта түседі.
Сол аралықта мен қытайлардың өмірімен, тыныс-тіршілігімен танысып, өзіме жаңа достар таптым. Саньядағы демалыс маған өте ұнады. Қуанышымда шек жоқ және армандаған қаламда болып қайттым десем қателеспеймін.