Құрметті «Эйр Астана» жолаушысы!
And so this is Christmas, «Сонымен,
Рождество» деп жазылған біздің мұқабамызда. Бұл — Джон Леннонның сол кездердегі барлық рокерлерге белгілі әнінің бірінші жолы.
Екінші жолында «Ал сен не істедің?» делінеді. Леннон бұл сұрақты біздің бәрімізге қойып отыр, ол 2017 жылдың соңында да әбден қисынды. Жыл біз үшін өте қауырт болды, біз Астанадан Делиге және Киевке жаңа рейстерді іске қостық, Астанадан Лондонға, Парижге, Пекинге, Санкт-петербургке, Сеулге, Тбилисиге, Екатеринбургке, Новосібірге және Омбыға рейстердің жиілігін арттырдық.
Бұдан басқа, біз Астана мен Франкфурт арасындағы рейстерге Lufthansa German Airlines әуе компаниясымен код-шерингтік келісім жасастық, бұл қызметтердің толық спектрін көрсететін аса ірі әуе компаниялары тобының орасан зор желісіне қолжетімділік алуымызға мүмкіндік береді. Біз жергілікті және шетелдік клиенттердің Skytrax рейтингіне сәйкес алтыншы жыл қатарынан Орталық Азия мен Үндістандағы ең үздік әуе компаниясы болып табылатын біздің компаниямыздың ауқымды бағыттар тізбесіне қолжетімділік алулары үшін Астанадағы «Нұрсұлтан Назарбаев» әуежайы арқылы тоғыспалы рейстердің мықты желісін құруға орасан зор күш жұмсадық.
Біз қызмет көрсету саласындағы инновациялардың үздіксіз еңбектенуді қажет ететіндігін, өйткені салалық стандарттардың үнемі өсіп отыратындығын жиі айтамыз. Биылғы жылы біз өзіміздің алыс магистральдық Boeing-767 ұшақтарымызда Wi-fi желісін, креслоларының арқалары дербес экрандармен жарақталмаған барлық лайнерлерде KCTV ағындық ойын-сауықтар жүйесін, сондай-ақ борттағы мінез-құлық ережелері туралы жаңа бейнероликті іске қостық, біздің ойымызша, бұл бейнеролик қауіпсіздік мәселелері туралы креативті әңгімелейді; салондағы төсек-орын жабдықтары да жаңартылды. Біз отырғызу талондарына арналған мобильді қолданбаны жетілдірдік, ол енді Астана мен Алматыдан ұшатын барлық маршруттарда жұмыс істейтін болады. Ішкі рейстермен саяхаттайтын жолаушылар үшін астаналық «Шаңырақ» бизнес-залын аштық. Біз Airbus NEO он алты лайнеріне және Embraer E2 бес лайнеріне тапсырыс беріп қойдық, оларды жеткізу келесі жылдың басына белгіленіп отыр.
«Нұрсұлтан Назарбаев» әуежайында жаңадан заманауи халықаралық терминал ашқаны үшін және туризм мен саяхат саласындағы бизнесті жандандырып, 3 миллионнан астам адамды жинаған Астанадағы EXPO көрмесін аса табысты өткізгені үшін Үкіметке алғысымды білдіргім келеді және бұл ілгерілеудің ұзақ мерзімді перспективаларға ие болатындығына сенім артамын. Леннон жазғандай (оның сөздерін сәл-пәл өзгертіп берейін): «Біз достарымыздың көмегінің арқасында бәрін де еңсереміз».
Жаңа жыл сіздерге және отбасыларыңызға жаңа бақыт, жаңа табыс әкелсін! Бізге бейілдіктеріңіз үшін алғыс білдіремін! Құрметпен,
Питер Фостер,
«Эйр Астана» әуе компаниясының президенті