Қауіпсіздік — биіктікте
«Эйр Астана» өзінің әлемдік қауіпсіздік стандарттарына сәйкестігін осымен алтыншы рет дәлелдеп берді — әуе компаниясы Халықаралық әуе көлігі қауымдастығының (IATA) пайдалану қауіпсіздігі жөніндегі IOSA аудитінен ойдағыдай өтті. Ең алғаш әуе компаниясы аудиттен 2007 жылы өтті және әр екі жыл сайын — 2009, 2011, 2013 және 2015 жылдарда сертификаттаудан өтіп тұрды. Келесі аудит 2019 жылға жоспарланған. Пайдалану қауіпсіздігі жөніндегі IOSA аудиті — әуе компанияларындағы бақылау жүйелерін бағалау және өндірісті басқару үшін әзірленген, тексерудің халықаралық дәрежеде танылған жүйесі. Соңғы аудит барысында құжаттамаға және әуе тасымалдаушысы қызметінің барлық салаларындағы
IOSA мыңға жуық стандарттарының орындалуына тәуелсіз тексеру жүргізілді. Оларға ұйымдастыру мен басқарудың корпоративтік жүйелері, ұшуларды басқару және диспетчерлік қызмет, ұшақтарға техникалық және жерде қызмет көрсету, бортта қызмет көрсету, жүктермен операциялар және авиациялық қауіпсіздік жатады.