Сәкен Жақсыбаев, дизайншы
Меніңше, осы қаладағы саяхатты Еркіндік мүсініне барудан бастаған дұрыс сияқты. Бұған тұтас бір күндеріңізді жұмсауға дайын болыңыздар, оған еш өкінбейсіздер! Мүсіннің маған қатты әсер еткені соншалық, оны сөзбен айтып жеткізу қиын, өйткені мен бала кезімнен оны өз көзіммен көруді армандаған едім, сол сенімім ақталды.
Еркіндік аралынан материкке қайтып оралған бойда, міндетті түрде Бэттери-паркте, қаржы орталығында серуендеп, Бұқа мүсінінің жанында суретке түсіңіздер. Содан кейін сіздерді Бродвей және Таймс-сквер күтеді. Осы аңызға айналған көшелердің кереметін толық сезіну үшін оны күндіз де, түнде де аралағандарыңыз дұрыс болады. Қаланың ғажайып көрінісі мен Нью-йорктің шығанақтарын ұшар биіктен тамашалаңыздар. Ол үшін ең биік нүкте — Эмпайр-стейт-билдингке немесе Крайслер билдингке шықсаңыздар болды.
Мен Нью-йорктің барлық аудандарын аралап шықтым, бірақ маған бәрінен де Манхэттен қатты әсер етті. Қаланың барлық негізгі көрікті орындары нақ осы жерде орналасқан. Әрине, әлемдегі өте әдемі парктердің бірі — Орталық паркте жарты күндеріңізді өткізіңіздер. Мұнда сіздер аллеялармен қыдырып, қаланың абырсабырынан демаласыздар және ағаш көлеңкелерінің саясында кітап оқи аласыздар.