Құрметті «Эйр Астана» жолаушысы!
Соңғы бірнеше жыл ішінде бүкіл әлем саяхатшылары әр түрлі қалаларға, аймақтарға және елдерге сапарларын жоспарлап, қонақүйлерді, ресторандарды, көрнекті туристік орындарды, мұражайларды және табиғаттың әсем көріністерін таңдау кезінде пікірлер мен ұсынымдар алу үшін Tripadvisor сайтын белсенді қолданады. Tripadvisor рейтингтерді құрастыру үшін сайтқа кірген адамдардың пікірлерін пайдаланады, солардың әрқайсысының шынайылығы мен риясыздығына сенімділік болмаса да, осы пікірлер жеткілікті мөлшерде көп жиналғанда, қарастырылып отырған нысандардың сапасына әділ баға беретіндей жалпы көріністі қалыптастырады. 2017 жылы Tripadvisor сайты әуе компанияларына арналған бөлімді іске қосты, онда 2018 жылғы жаһандық рейтинг жарияланды. Мен 30-дан астам елден 589 саяхатшының пікірлерін (мақала жазылған кезде) есепке алу қорытындысы бойынша, «Эйр Астана» компаниясының ең үздік аймақтық әуе компаниясы болып танылғандығына қуаныштымын. Сіздерге қолдау көрсеткендеріңіз үшін, ал әріптестеріме осыны жасағандары үшін алғысымды айтқым келеді. Біз қызметтеріміздің сапасын жақсарту үшін жұмысымызды жалғастырамыз және сіздердің жаңа пікірлеріңіз бен ұсыныстарыңызды күтеміз.
Жақында біз Астана мен Ресейдің оңтүстігінде орналасқан Түмен қаласы арасындағы рейсті іске қосамыз. Бұл –
«Эйр Астана» әуе компаниясы тұрақты әуе қатынасын орнатқан Ресей Федерациясындағы жетінші қала, біз Түмен қаласынан және онымен көршілес аймақтардан ұшатын жолаушыларды біздің кең ауқымды желімізді және марапаттарға ие болған сервисімізді пайдалануға шақыру мүмкіндігін асыға күтеміз.
«Эйр Астанамен» ұшу сапарларыңыз жайлы болсын!
Құрметпен,
Питер Фостер,
«Эйр Астана» әуе компаниясының президенті