Қаланың тыныш көшелері
Акьяка тоқтаусыз дамып келе жатқан көршілес Мармарис пен Бодрумға ту сыртымен бұрылып тұрғандықтан, ол заңды түрде слоуфуд қозғалысын ұйымдастыруға болатын Түркиядағы алғашқы қалалардың бірі болды да, 2010 жылы Cittaslow International ұйымы өз таңдауын нақ осы қалаға тоқтатты. Аталмыш қозғалыс өңірдің аспаздығы мен қоршаған ортаны қорғауға қолдау көрсетумен қатар, бүкіл әлемдегі қалаларда тұрмыс жағдайын жақсартуға септігін тигізеді.
Слоуфуд қағидаттарын сақтай отырып, Акьякадағы ресторандардың көпшілігі өздерінің ас мәзіріне жергілікті эгей тағамдарын енгізеді, солардың негізін көршілес фермалардан, Азмак өзені мен теңізден жаңа әкелінген өнімдер құрайды. Балық тағамдарынан сіздерге тұщы суда өсетін бақтақты, теңіздің табан балығы мен тікенді балықты, ал тіскебасарлардан теңіз аскөгі мен күріш қосып фаршталған кәді гүлдерін ұсынулары мүмкін. Десертке ешкінің сүтінен дайындалған тәтті балмұздақ береді.
Азмак өзенімен саяхаттағанда аялдама жасап, жағалауда орналасқан балық ресторандарының бірінен жергілікті тағамдардың дәмін татуға болады. Суға тіреліп тұрған мекемелердің ағаш террасалары түріктің таңертеңгі кенеулі тамағы үшін мінсіз сай келеді, оның құрамына жергілікті ірімшіктер, зәйтүн, тосап пен бал кіреді. Өзен бойымен жүргенде мөп-мөлдір толқындарды бақылаңыздар және тасбақалар мен кәмшаттардан көз жазып қалмаңыздар. Қамыс қопаларын үйректер мен батпақты жердің құстары мекендейді, солардың қатарында ләйлектер де бар. Акьяка қанаттыларды бақылауды ұнататындар үшін керемет демалыс орны болады.