«Тамақтан. Ғибадат қыл. Сүй» кітабының ізімен
Бали әрқашан туристердің арасында танымалдыққа ие болған. Мұнда судағы спорт түрлерін ұнататын серфинг, дайвинг әуесқойлары келеді, оны жаңадан үйленген жас жұбайлар, дауншифтерлер, суретшілер, мүсіншілер, өнер адамдары — жалпы алғанда, бойларын жазып, мұхит жағасында, күріш алқаптарының арасындағы қарапайым лашықта біраз уақыт тұрып көргілері келетіндердің бәрі жақсы көреді. 2006 жылы Элизабет Гилберттің «Тамақтан. Ғибадат қыл. Сүй» атты кітабы аралды аса үлкен танымалдыққа жеткізсе, 2010 жылы басты ролінде Джулия Робертс ойнаған фильмнің экранға шығуы оны және әсіресе Убуд деревнясын Меккеге айналдырып жіберді десе де болады. Біз өз саяхатымызды осы жерден бастаймыз.
Убуд әрқашан өзінің қолөнершілерімен атақты болған, бұл жер теңізге жақын емес, есесіне оны тропикалық ормандар мен таңғажайып күріш террасалары қоршап тұр. Фильм шыққаннан кейін мега-жұлдызға айналған көріпкел Кетут Лиердің үйі бұл жердің басты айшықты орны болып табылады. Өз тағдырларын білуге ұмтылған мыңдаған туристер осында тартылып, бір кездері Элизабет Гилберт көрген қарапайым үй енді рухани орталыққа айналған. Кетут Лиер екі жыл бұрын қайтыс болды, бірақ оның ісін 64 жасар ұлы Ниоман Латра жалғастыруда. Ол да адамдарды қабылдап, алақандағы сызықтарынан олардың тағдырларын оқиды, жылы сөздерімен жігерлендіреді.
Айтпақшы, мұнда жай ғана бау-бақшаларды аралап қыдыру, суретке түсу үшін келуге де болады, мұнда booking.com арқылы бөлмені алдын ала брондап, небәрі 25 долларға түнеп шығуға болады. Әрине, Ниоман Латра көптеген жалпылама сөздерді айтады, бірақ біздің әрқайсымызға тек өзімізге ғана белгілі нәрселерді де айтты. Және алақандағы сызықтарды да дәл тауып оқиды. Бәлкім, көбі оған болашағын білу үшін емес, ал жандарын жайландырып, үміт отын ұялату үшін де келетін болар. Мұнда йогамен, медитациямен айналысуға, сауықтыратын массаж жасауға немесе жай ғана тынығуға болады. Убудта Кетуттың үйінен басқа йога және медитация орталықтары көп, бұл жер демалуға өте жақсы.