Балалардың
Дубайдағы каникулы
Дубай — бұл тек керемет жағажай, тамаша ресторандар және сәнді дүкендер ғана емес. Сіздер қысқы каникул кезінде балаларыңызбен осында келсеңіздер, еш өкінбейсіздер — сіздерге көңілді, есте қаларлық қызықты оқиғалар мен ойын-сауыққа толы отбасылық демалыс кепілденеді.
Ең алдымен, сіздерге өз смартфондарыңызға Kidzapp мобильді қолданбасын алдын ала орнатуға кеңес беремін. Сіздер одан жақын арада болатын, балаларға да, ересектерге де қызықты барлық оқиғаларды, іс-шараларды, концерттерді, ойын-сауық орталықтарын табасыздар. Оңай навигация жылдам жол табуға көмектеседі. Қолданбаның сондай-ақ билеттерді сатып алуға жеңілдіктер беретіндігі бонус болып табылады. Қолданбаны орнату арқылы сіздер бүкіл отбасына арналған демалыстың болжалды жоспарын құра аласыздар және әлдебір қызықты шараларды өткізіп аламыз деп алаңдамайсыздар.
Air Maniax
Air Maniax — үлкен ойын-сауықтық батут кешені. Бүкіл отбасымен уақыт өткізу үшін тамаша орын. Ересектер де батутта секіріп, барлық туннельдерден балалармен бірге өте алады, мұның оларды қуантары сөзсіз. Кедергілер алабы өз күштері мен жылдамдықтарын сынағысы келетіндер үшін көңілді бастама болады. Егер сіздер әлдеқайда экстремалды нәрсені қаласаңыздар, Zip Zag тарзанкасы — тамаша шешім. Лазерлік бөлме, туннельдер, әуе баскетболы және батут төбешіктері — Air Maniax кешенінде әркім өзіне ұнайтын ойынсауығын табады.
Екінші қабатта дәмхана орналасқан, онда сіздер тамақ пен сусындарға тапсырыс бере аласыздар. Балалар төменде ойнап жүргенде, ересектер осы жерде алаңсыз демала алады, өйткені екінші қабаттан бүкіл ойын орталығы көрініп тұрады.
Бұл жерде сағат сайын балаларға ғана емес, ересектерге де ұнайтын сиқырлы шоу өткізіледі. Ең бастысы — сиқырлы трюктарды жіберіп алмау үшін сиқыршыға жақынырақ орын алып үлгеру.
Кешенге келушілердің ең төменгі рұқсат етілетін жас мөлшері — 2 жас. Бойлары 94 смден төмен балалар үшін арнайы балалар аймағы бар. Air Maniax кешеніне баруды алдын ала жоспарлаған жағдайда, Kidzapp қолданбасы арқылы билеттерді жеңілдікпен сатып алуға болады. Билеттің стандартты құны — адам басына 80 дирхемнен 160 дирхемге дейін.
Kidzania
Бұл — нағыз балаларға арналған қала, онда балалар өрт сөндіруші, жедел жәрдем дәрігері, тіс дәрігері, пошташы, радио жүргізушісі, ұшқыш және көптеген басқа да мамандықтарда өздерін байқап көре алады.
Бұл шағын қаланың ішіне ересектерді кіргізеді, бірақ барлық жерде дерлік балаларыңызды қадағалауға болатын шыныдан жасалған шолу есіктері бар. Өз жұмыстары үшін сыйақы ретінде балалар Kidzania-ақша алады, оны олар орталықтан шығар кезде ойыншыққа жұмсай алады. Мұның балаларға жақсы сабақ болатындығы сөзсіз, осылайша, олар еңбекпен тапқан ақшаларын бағалауға және оларды өздігінен жұмсауға үйренеді.
Kidzania қалашығының ішінде бірнеше жылдам тамақтану дәмханасы бар, оларда жеңіл-желпі тамақтанып алуға болады.
Смартфонға The Entertainer мобильді қолданбасын орнатсаңыздар, сіздер Kidzania арнайы купонын пайдалана аласыздар.
Бұл нұсқа бірнеше баласы бар адамдарға қолайлы, өйткені сіздер бір билеттің бағасына екі билет сатып ала аласыздар.
Айтпақшы, The Entertainer қолданбасын сондай-ақ Дубайдың көптеген ресторандары мен дәмханаларында, ойын-сауық орталықтарында және аквапарктерінде де пайдалануға болады. Оның көмегімен бір билеттің немесе бір негізгі тағамның бағасына екі билет немесе екі негізгі тағам сатып алуға болады, бұл — үлкен отбасы демалысы үшін тамаша ұсыныс.
Butterfly Garden
Бұл — үлкен, жабық көбелектер бағы. Мұнда олардың 40-тан астам түрін көруге болады. Балалар мен ересектерге адамдардан мүлдем қорықпайтын, айнала ұшып, қолдарыңызға келіп қонатын көбелектерді бақылау қызықты болады. Көбелектер жандарыңыздан ұшып өтіп кетпесін десеңіздер, қызыл түсті киім киіңіздер, бұл түс оларды қызықтырады.
Ағаштар мен бұталардың жанынан өткенде, назар салып қарасаңыздар, көптеген жұлдызқұрттар мен пілләларды көресіздер. Сіздер бақ қызметкерлерінен балаларыңызға көбелектердің даму сатылары және осы сұлулардың өмірінен алынған басқа да қызықты фактілер туралы әңгімелеп берулерін өтінулеріңізге болады.
Бақты тамашалап болған соң, кетуге асықпаңыздар. Дәл осы ғимаратта балалармен бірге мультфильм көріп, демалуға және дәмханада жеңіл-желпі тамақтанып алуға болатын тегін кинотеатр бар. Паркке кіру билетінің құны — 55 дирхем. 2 жасқа дейінгі балаларға кіру тегін.
Miracle Garden
Көбелектер бағында серуендегеннен кейін Butterfly Garden бағынан жаяу жүріспен бес минуттық жерде орналасқан Miracle Garden — Таңғажайыптар бағына аттаныңыздар. Бұл бақтың оранжереясында 150 миллионнан астам өсімдік бар. Толығымен гүлдерден құралған әр түрлі мүсіндер, тұтас үйлер және тіпті көлемі нағыз ұшақпен бірдей етіп жасалған ұшақ ешкімді бей-жай қалдырмайды. Мұнда әр апта сайын белгілі бір сағаттарда балаларға арналған шоулар мен ойын-сауықтар өткізіледі. Ең қызықтыларын өткізіп алмау үшін Miracle Garden бағындағы бағдарламалар кестесін алдын ала қарап алуға кеңес беремін. 2 жастан 12 жасқа дейінгі балалар үшін кіру құны — 40 дирхем, ересектер мен 12 жастан асқан балаларға — 50 дирхем. Билеттерді dubaimiraclegarden.com сайтынан онлайн сатып алуға болады.
Olioli
Балаларға арналған Olioli ғылыми интерактивті мұражайы — балалар мен ересектер үшін тамаша орын. 2 жастан 18 жасқа дейінгі балалар үшін кіру құны — алғашқы 2 сағатқа
126 дирхем, бұл — экскурсияның ең аз уақыты, және одан кейінгі әрбір сағатқа — 30 дирхем. Ересектер үшін кіру құны 42 дирхем тұрады.
Мұражайда 8 галерея бар, олардың әрқайсысы белгілі бір тақырыпқа арналған. Air (Ауа) залында балалар арнайы құбырлардағы ауа ағынын бақылап, тәжірибе жасай алады немесе қуаттылығы сағатына 110 км құрайтын дауылдың күшін сезіне алады. Осы залдағы экспозицияның арқасында балалар аэродинамика заңдары мен ұшу қағидаттарын жақсырақ түсіне алады.
Creative Labs (Креативті зертхана) — балаларды процестен ләззат ала отырып, құрылыс салуға, өз дизайнын ойластыруға, күрделі конструкцияларды жинауға үйрететін орын.
Toshi залы — кез келген баланың арманы.
Үлкен аспалы арқан желісінің ішінде балалар жүгіріп, секіріп, нағыз төбешіктен сырғанағандай сырғанай алады және әр түрлі көлемдегі көптеген саңылаулардан ыңғайын тауып өте алады.
Үлкен аспалы торда тербеліп, өздеріңізді адам тұрмайтын аралда жүргендей сезінуге болады.
Future Park (Болашақ паркі) галереясында балаларыңыз болашақтың түндігін түріп, жоғары технологиялар мен электроника әлеміне шома алады. Керемет түстер, дыбыстар мен суреттер тіпті ең кішкентай қонақтар үшін де қызықты болады. Бұдан басқа, оларға кішкентай балалар аймағы қарастырылған.
Залдардың бірінде қол астындағы құралдардан шатырлар мен қамалдар тұрғызуға болады. Бұл жерде кішкентай ханшайымдар мен серілердің қиялында шек болмайды. Бұл — армансыз айқайлауға, құмардан шыға жүгіруге, жастықтармен шайқас ұйымдастыруға болатын жер. Автомобильдерді және басқа да көлік түрлерін ұнататындар үшін арнайы бөлінген аймақ бар, онда тек ойнап қана қоймай, өз көліктерін жасап алуларына да болады.
Water (Су) галереясына соңғы кезекте барған жөн, өйткені үстеріңізді сулап алуларыңыз мүмкін, бірақ бұл — көңіл көтерудің, әрине, осыған тұрарлық бір бөлігі.
Мұражай жұмыс күндерінде — сағат 9:00-ден 19:00-ге дейін, демалыс күндерінде сағат 9:00ден 21:00-ге дейін ашық. Ішінде жеңіл-желпі тамақтанып алуға болатын балалар дәмханасы бар.
Laguna Water Park
2018 жылғы мамыр айында ашылған Laguna аквапаркі — балалы отбасылар үшін тамаша нұсқа. Қолайлы баға саясаты мен орналасу орны туристерді ғана емес, жергілікті тұрғындарды да қызықтырады, сондықтан мұнда демалыс күндерінде емес, жұмыс күндерінде келген дұрыс. Аквапарк көптеген ресторандары, балалар алаңдары, дүкендері және кинотеатры бар La Mer ауданында орналасқан. Laguna Water Park 4 тақырыптық аймаққа бөлінген: су төбешіктері мен аттракциондары, балалар аймағы, серфинг орталығы және босаңсу (релакс) аймағы. Аквапаркке тұтас бір күнді арнаған жөн. Кешкі асты осы жерден, La
Mer ауданында орналасқан жайлы ресторандардың бірінен ішуге болады. Аквапарктің жұмыс уақыты — сағат 10.00-ден 18.00-ге дейін.