Пластик қалдықтардан жасалған орындықтар
Биылғы көктемде Алматыда қайта өңделген пластик қалдықтардан жасалған орындықтар пайда болды. Оларды қала ортасын жақсартуға және мегаполистегі өмір сүру сапасын арттыруға бағытталған «Бізалматы» жобасының қаражатына Rocket Plastic компаниясы жасап шығарды. Пластик орындықтар ағаш орындықтармен салыстырғанда орнықтырақ болып шықты. Осындай бір орындық 22 табақтан тұрады, әр табақтың салмағы — 1 кг, осылайша, оны жасауға 22 кг пластик кетеді. Өндірушілер орындық жасайтын шикізатты қоқыс полигонынан ғана емес, сонымен қатар, қала тұрғындарынан, сондай-ақ әр түрлі компаниялардан да алады — алматылықтар пластик жинауға белсенді түрде қатысады.