Құрметті «Эйр Астана» жолаушысы!
Tengri журналының өткен шығарылымында мен «Эйр Астана» мен Flyarystan-ның бірқатар ішкі рейстерінің, сондай-ақ «Эйр Астананың» бірнеше халықаралық рейстерінің қалпына келтірілгендігі туралы хабарлаған болатынмын. Бұл ақпарат ертерек болып шықты, өйткені Түркия мен Грузияға ұшу сапарлары Қазақстанда COVID-19 вирусымен ауырғандар санының артуына байланысты осы елдердің үкіметтерінің шешімімен уақытша тоқтатылды. Қазір мен осы жолдарды жазып отырғанымда, індет сәл кері шегінгенге ұқсайды. Сондықтан Амстердамға, Франкфуртқа, Дубайға, Сеулге және Киевке ұшу сапарлары қалпына келтірілді, таяу арада Түркияға, Грузияға, Ресейге, Өзбекстанға және Таиландқа рейстердің қалпына келтірілуі күтіледі.
Халықаралық әуе сапарларының уақытша тоқтатылуы және қалпына келтірілуі қайсыбір елдердегі вирус жұқтыру деңгейіне байланысты екендігі бүкіл әлемге белгілі, алайда оның жаһандық төмендеу үрдісі жалғаса түсетіндігіне үміттенеміз.
Жақсы жаңалық — ұшақтарда вирус жұқтыру деңгейі төмен немесе мүлде жоқ деп айтса да болады, бұған қос әуе компаниямыздың экипаждары ұстанатын қатаң санитарлық шаралар септігін тигізіп отырғандығы күмән тудырмайды, бұл үшін оларға шынайы алғысымды білдіргім келеді. Ішкі рейстеріміздің саны артып келеді, Flyarystan Алматы және Нұр-сұлтан қалаларында орналасқан негізгі базаларына қоса, Атырауда, Шымкентте және Қарағандыда қосымша базаларын құрды.
Енді сізде, Алматы немесе Нұр-сұлтан арқылы транзит жасамастан, ел ішінде арзан тікелей рейстерді пайдалану мүмкіндігі бар.
Дағдарыстың жағымды жанама әсері біздің Boeing 757 лайнерлеріміздің пайдаланыстан мерзімінен бұрын шығарылып, барлық негізгі халықаралық маршруттарда су жаңа Airbus
321 Long Range (LR) ұшақтарының қолданылуы болып отыр. LR жолаушылар үшін де, экипаж үшін де өте қолайлы болып отыр: бұл — бизнескластағы, сондай-ақ эконом-кластағы керемет ішкі көрініс пен жайлылық, сонымен қатар, ұшу сапарларының тамаша қашықтығы және отынның үнемді шығындалуы. Егер сіз онымен әлі ұшпаған болсаңыз, ұшып көріңіз, өйткені LR —саяхаттардың жаңа дәуіріндегі лайнерден күтуге болатынның нағыз өзі.
Сапарларыңыз сәтті болсын!
«Эйр Астана» әуе компаниясының президенті