Құрметті «Эйр Астана» жолаушысы!
Осы уақытқа дейін халықаралық рейстеріміздің кестесін едәуір кеңейте аламыз деп үміттенген едік, бірақ, өкінішке орай, олай болмады.
Көптеген елдер COVID 19 екінші толқынын бастан кешуде, мен осыны жазып отырған уақытта ол Қазақстанды шарпыған жоқ. Бұл жерде де, шет елдерде де барлық елдердің үкіметтері трансшекаралық саяхаттарға, туризм мен демалысқа сақтықпен қарайды. Сондықтан «Эйр Астананың» халықаралық ұшу сапарларының картасы жыл соңына дейін Дубайға, Франкфуртқа, Амстердамға, Стамбулға, Анталияға, Сеулге, Мәскеуге, Ташкентке, Киевке және Бішкекке рейстермен шектелуі мүмкін. Біз оларды Қызыл теңіздің мысырлық жағалауындағы Шарм-әлшейхке және Мальдив аралдарына чартерлік рейстермен толықтырғымыз келеді.
Біз үкіметтердің вирустың таралуын тоқтатуға бағытталған әрекеттерінің себептерін бағалаймыз және түсінеміз. Бірақ саяхаттар, туризм және демалыс индустриясы жаһандық экономикалық белсенділік пен жұмыс орындарының қуатты генераторы болып табылады. Бұл салалардың 2021 жылдың басында толығымен қайта іске қосылуы өте маңызды, олай болмаған жағдайда, қаржылық және әлеуметтік салдары ұлттық экономика үшін де, адамдардың өмірі үшін де аса ауыр болмақ. Біз, өзіміз толыққанды мүшесі болып табылатын IATA және Азия-тынық мұхит аймағы әуе желілері қауымдастығының (AAPA) хаттамаларына сәйкес, халықаралық рейстерге шығуға ниет білдірген жолаушыларды Covid-19 вирусына тестілеудің осындай қайта іске қосудың кілті болып табылатындығына нық сенімдіміз. Қазіргі биотехнологияларға орай, талдау мен сапарға шығу арасындағы уақыт аралығына байланысты тестілеудің теріс нәтижесі инфекцияның жоқ болуына жүз пайыз кепілдік бермейтіндігін түсінеміз, алайда қазіргі уақытта адам жүзеге асыратын қызмет түрлерінің қауіпке ұшырамайтыны кемде-кім, сондықтан қауіпсіздік пен экономикалық қиындықтардың арасындағы тепе-теңдікті іздеуге тура келеді. Осы жолдар жазылып жатқанда, Қазақстанның санитарлық органдары елге кіретін адамдар келуден көп дегенде 72 сағат бұрын тексеруден өтулері тиіс деген талапты енгізді және бұл шара тиімді болып көрінеді. Сонымен қатар, қазіргі уақытта қолда бар деректердің барлығы ұшақ бортында вирустың тарала қоймайтындығын айғақтайды.
Мүмкіндікті пайдалана отырып, 2021 жылда жақсырақ болады деген үмітпен сіздерге және сіздердің отбасыларыңызға осы жылдың саусаламатты және қуанышты аяқталуын тілегім келеді.
Құрметпен,
«Эйр Астана» әуе компаниясының президенті