Banduan tomulok kiangkab sumiliu ‘pensyarah’
SONGULUN banduan tomulok di muhang ointutunan sabaagi Sheila noopo kiangkab sumiliu songulun ‘pensyarah’.
Tumanud Sheila, 20, susumikul Sikul Henry Gurney (tondu) Kota Kinabalu, minaganu isio poporiksaan Sijil Balajaran Malaysia (SPM) toun diti sabaagi laang koiso montok popotopot do iman-imanon dilo.
“Momonsoi oku di tosonong kopio id poporiksaan SPM toun diti om alansan kopio kopongoput balajaran doid bogian lobi takawas montok momodimpot angkab di iman-imanon dilo,” piniopuan dau ontok romuto media kalapas nakamanang koiso Bogian Pidato Boros Inggeris kopinamot Pialaan Ko-Akademik, Koubasanan om Monupu Sikul Intergriti om Sikul Henry Gurney Zon Sabah 2016, di tadau Kaapat nakatalib.
Om kotumboyo nogi isio do tinan dau do ogumu noh kinosimbanan tosonong mantad podi nosiliu susumikul sikul dilo solinaid duo toun walu wulan.
“Pingludaan solinaid duo minggu noruhangan miampai toilalaan ‘johan’ ontok toun diti minanahak dogo lobi kotumboyo ontok tumoguang miampai tulun togumu,” ka dau.
“Kinosimbanan di okito kopio nga kaanu oku popoinsomok tinan ku miampai agama om nogi kaanu popokito do koulalahon (disiplin) om koyuoyuon tinan di lobi tosonong,” ka dau.
Om susumikul Sikul Intergriti Kota Kinabalu, Jo minaganu timpu sombulan montok momonsoi koposodiaan pogului minamalantoi Pialaan Pokitonan Sains om au popolosok do gaab dau montok mongonggom iso ‘diploma’.
Isio ih dumimpot umpur 21 toun ontok 30 Ogos diti, kopuriman nobobos kopio soira nakaanu pinopokito do kobulihan di poinlosok idsuang tinan dau.
“Id timpuuni mimang sinansagan katapi maid-laid nokosoribau kaanangan om baino diti orohian oku balajar mato balajaran Sains.
“Minomili yahai topik ‘Konsep Tekanan’ & ‘Inersia’ montok pokitonan om au nasangka obuli kamanang.
“Alhamdulillah, hiti haro mongingia ih monuduk/mangajar dagai om haro kosiwatan maganu SPM.
“Nung haro ‘rezeki’ kigaab oku mongoput ponginabasan id Open University Malaysia (OUM),” ka dau.
Jo ih pinosuang doid Sikul Intergriti Kota Kinabalu ontok 2014 kotumboyo do paganakan dau kopuriman asanang miampai kinosimbanan koulalahon dau.
“Bogian sikul ogumu minomonsoi abaabayan songowian paganakan miagal ‘Jalinan Kasih’. “Soira koruba paganakan, koilo yolo doho lobi osonong om haro koulalahon ginawo di tosonong doulu noh kumaa molohing,” kawagu dau.
Namot dilo, Potunud Jijiilan Pogun Sabah om W.P Labuan Suria Idris minoboros, susumikul ngawi id sikul dilo irad ko ‘mutiara’ id suang bututak di kigatang nung gompion tososonong.
Kawagu dau, koupisan dilo toririmo ‘optimis’ monulung susumikul ngawi papanau do pongolingosan om popoingkawas do kobulihan diolo montok poposoribau tulun kiguno om popotilombus pisokodungan miampai OUM montok mongukab ralan kumaa susumikul di otorimo mongoput ponginabasan id bogian ‘diploma’.
“Kopotopotan diolo okito kopio soira haro id pialatan diolo nokotorimo ‘tajaan’ mantad koporintaan pogun montok popolombus do balajaran.
“Poposodia tokou kounalan di tosonong miagal kalas pambalajaran, panambasaan buuk om winakas monunuduk gisom toinsanan susumikul ih mirikau do poporiksaan SPM toun 2015 nokoponurat nakapaas 100 paratus,” ka dau ontok pinotimpuun do abaabayan koponutuban pialaan dilo.
“Masaon tokou nogi do mogiboboros miampai iso mantad sikul tuuniyon nointutunan hiti montok poposodia do kalasa tuuniyon montok susumikul ngawi tumilombus papalaab do kobulihan diolo,” ka dau.
Montok pialaan dilo, kiginumu 82 susumikul mantad Sikul Intergriti Kota Kinabalu, Sikul Henry Gurney Keningau om Sikul Henry Gurney (Wanita) Kota Kinabalu minaganu bogian ih pinopisaap do turu bogian ino nopo nga Pialaan Pidato Boros Malayu, Pidato Boros Inggeris, Sayau Koubasanan, Monupu, Pokitonan Sains, Suminding om Drama Teater.
Id ramai dilo nogi, Sikul Intergriti Kota Kinabalu pinoboros sabaagi ‘johan’ koinsasanai soira minamalantoi tolu mantad turu pialaan di pinapanau.
Nokotindapou nogi id ramai dilo nga ih Potunud Jijiilan Longkod Kota Kinabalu, Rosman Norman.