Koligaganan kopohompit duo padsakaian id Kampung Nalapak, Ranau Songulun noduso, duo nosindualan
RANAU: Songulun kusai noduso om duo ih suai nosindualan id koligaganan kopohompit do pinilanggaran duo padsakaian id Kampung Nalapak, poingoros Kabun Gaharu, hiti di tangadau konihab.
Munggui, Justin Torong, 54, pinatantu do minidu pogun notilombus id tampat kinantakan di nantakan kiikira jam 12 tangadau.
Luguan Balai Bomba om Manampasi ( BBP) Ranau Jimmy Lagung minoboros do kinoligaganan dilo kopohompit do duo padsakaian, ino nopo nga korita Perodua Viva om korita 4WD kawo Nissan Navara.
“Nakaanu tokou pamalahauan kaagaban id jam 12.15 tangadau om minonuhu do walu puru kaamung upisor minoi id tampat kinantakan kisinodu 15 Kilometer mantad tampat BBP,” ka dau.
Minoboros isio do puru ih nokorikot id tampat kinantakan kiikira 20 minit kalapas diri pinapanau do karaja pinapalabus munggui di nagansip.
“Nakaanu tokou pinapalabus munggui, poingkuro poh nga bogian lamin pongusapan ih nokorikot id tampat kinantakan pinapatantu do munggui minidu pogun sabap noindamaan nosindualan.
“Duo kagu munggui tondu pinoruput do nosindualan, songulun kiumur 31 toun noindamaan nosindualan soira notipu id ponong longon om kakod, om munggui koduo kiumur 55 toun au osongkuro nosindualan,” ka dau.
Ka dau, toinsanan munggui nosindualan pinaatod doid Hospital Ranau montok pokiubatan om munggui noduso pinatahak doid pulis montok laang potilombus.
Minoboros isio do karaja koinsasanai naawi id jam 12.48 tangadau om natadon kinoligaganan kakaal poh soriukon do bogian monguasa.