Esscom tumihombus popogiot kapadtamangan koumohigan

LAHAD DATU: Tinimungan koumohigan minanaan 18 modidikot aiso kasagaan (PTI) om minamaga’au 125 karton sigup, himo bot pam om 15 vatang kazu bakau id apar ‘ operasi’ misusuvai tinoina do Boogizan Koumohigan Poimbida Papak Kohisa’on Sabah (Esscom) poompus minggu diti.

Sigup ih na’au nopo nga jenama Astro om Cannon Menthol, om kazu bakau kitukuan himo insi diameter om 15 kaki ninau’.

Komander Esscom, DCP Dato’ Wan Abdul Bari Wan Abdul Khalid minoboos do operasi ih kopoompit do mogisusuvai agensi koumohigan dino pinouhan id apat uvang id Esszone kapaamung uvang Semporna, Sandakan, Tawau om Kudat.

Ka disido, kinahantazan dino nopo nga asil pinisokodungan om pinalatian toinsanan tinimungan koumohigan miaga Pulis Diraja Malaysia (PDRM), Agensi Popogiotkuasa Maritim Malaysia ( Maritim Malaysia) om Tinimungan Susumangod Malaysia (ATM).

“Pinogiot vagu do Esscom o kapadtamangan koumohigan miampai pinopoingkavas do pongizonan tinimungan koumohigan om vesel id tampat kikobohingkaangan di kikotumbazaan nadadi lahan tikus tuhun talaat maza pivohitan om kosuangon PTI miampai aiso kasagaan,” ka disido.

Monongkotohuod isido doid toinsanan boogizan nokoompit id kalaja dino om kikahansanan iho kaanu monguang do kapaagatan koimaan talaat maza pivohitan om kosuangon PTI.

Namot dino, nuhit vagu di Wan Abdul Bari o kopokionuon doid toinsanan mongindapu bot mamagazat om monginsada ngavi daat aahom tu sumikap popoluput kapamanaan om tampat dosido doid Hongkod Operasi (PUSOP) Esscom potitikid timpu.

Ka disido, iho montok popomiho do tinimungan koumohigan manaak do sakadai tosikap aantakan toiso-iso kaantakan di au avasi.

“Krew ngavi bot mositi tomoimo miingatingat om koiho miampai koozuvon posoihi kaamung popoluput miampai tosisikap sokio ko koiho kivaa tuhun ih moosi-osi minsomok bot, tohimbuson popoluput doid PUSOP Esscom id numbul 089 863181,” ka disido.