UPPM: Aiso Ponorikohon JKKK om Ketua Kampung pinalapas
INANAM: Kabar tongus ih minoboros do kiharo piipiro tulun Ponorikohon Tinan Koburuon om Koumoligan Kampung (JKKK) om Ketua Kampung (KK) id watas Inanam ih kaaka do pinalapas di Unit Momuruan Kotundaan Rayat (UPPM) Inanam nopo nga au otopot om kigaab taraat montok paparaat ngawi do kopomuruanan UPPM Inanam.
Tumanud Momuruan Kotundaan Rayat ( PPM) Inanam Gundohing Fredolin Totin Bangon, kiharo tulun ngawi pointantu ih pinaparayat do surita au otopot kikoompitan kinapalapasan diti gisom nokopongimbulai do katangaban id pialatan ponorikohon JKKK om Ketua Kampung.
“Haro, id pialatan diolo ih nokoponorubung noh dogo montok mokiilo do surita di totootopot,” ka dau ontok romuto kalapas Abaabayan Pinonimpuunan Pinonutuban Abaabayan Ponorinaan om Kapawakasan Tinan pinanjur UPPM Inanam miampai pinisokodungan Tinimungan Yayasan Sabah Zon Pantai Barat Selatan ih pinaharo id Hotel Puri, Inanam di tadau Koduo nakatalib.
Minoboros Fredolin do mantad podi linantik isio sabaagi PPM, au poh nokoumbal bogian dau minaganu laang miampai pinapalapas kopohompit do ponorikohon JKKK om Ketua Kampung ngawi id bogian Inanam katapi toririmo disio muhang maganu do tuwa pomusarahan mantad mogisusuai tinan nung kiharo palantikan ponorikohon JKKK om Ketua Kampung nogi.
Namot dilo, ounsikou nogi Fredolin miampai pangaramitan di tosonong kopio mantad ponorikohon JKKK, KK om JKDB id bogian Inanam ih minamung nogi id abaabayan diti montok tujuan momoruhang toilalaan doulu noh ontok papanau do karaja ngawi kikoompitan ponorinaan om kopotundaan toiso- iso kampung.
Isio, ih nogi Luguan Bogian PBS Inanam, pinoposorou nogi do ponorikohon JKKK om Ketua Kampung tuh kopokito do koulalahon di totopot om kitonggungan ontok papanau do karaja ngawi om au momili wulu ontok manahak sakadai sundung pia puru dilo misusuai pangaratian pulitik.
Alansan kopio isio, tuh ponorikohon JKKK, Ketua Kampung om JKDB kaanu manahak pisokodungan poimponu kumaa disio sabaagi PPM mooi nunu noopo pamalanan om kopotundaan toiso-iso kampung di napalan noh kaanu papanau miampai kalantoi.
Minongomi kokomoi kopokionuon mantad Luguan Bogian Parti Bersatu Rakyat Sabah ( PBRS) Bogian Inanam idsuang ahal di pinaatag miting tagayo tounanparti dilo di kawawagu ih muhang puru ngawi PBRS id Inanam onuan karaja id bogian kampung miagal ponorikohon JKKK om Ketua Kampung, pinatarang disio do bogian UPPM toririmo monorimo pangapalaian nung tulun di pokilantikan dilo kaanu sokodung ‘ majoriti’ mantad mogigion kampung di kohompit.
Ka dau, mongigit karaja ngawi id bogian kampung ih haro baino id Inanam okon ko sinongkayu di iso parti noopo katapi kiharo nogi mantad parti pikoruhangan Barisan Nasional (BN) ih suai.
Nokotindapou nogi id ramai dilo nga Upisor Koburuon Rayat (PKM) Inanam, Lukin Taliban om Monijor Tinimungan Yayasan Sabah, Zon Pantai Barat Selatan, Hanafiah Diman.