JPBM Sabah minggisom manahak koponudukan kumaa tulun ngawi minsingubas do momunso kinotutudan - Nordin

KOTA KINABALU: Koupisan Bomba om Manampasi Malaysia ( JPBM) Sabah tumilombus papawakas kopohompitan miampai tumopot kopio montok manahak koponudukan kumaa koinsasanai montok poposoribau iso mogigion di minsingubas do koubasanan momunso kinotutudan.

Potunud dau Nordin Pauzi minoboros do kopointalangan timpuunon kokomoi koumoligan kinotutudan id kinoiyonon om premis id pialatan mogigion ngawi kiguno montok popomilo kapaganu do laang opurokis montok moningolig niawa om harata kakamot.

Minoboros isio do mogisusuai laang om kaparagatan koponudukan papanaon do JPBM id bogian balai om pogun id pointongkop pogun ih kopohompit do toinsanan rayat.

“JBPM Sabah papaharo do kaparagatan ‘ceramah’ koumoligan kotutudan songowian momuruan rayat om mogigion songkoiyonon id Lamin Koundangan Pogun bogian Tanjong Batu, Tawau kopohompit poingkuro kopomogunaan kakamot pomisok tapui, demonstrasi kakamot pomisok tapui om ‘ Program Teman Pili Bomba’.

“Suai ko ilo, monuridong tokou nogi do Tinimungan Bomba Sukarela om Bomba Komuniti id bogian dilo,” ka dau ontok pinapaharo kotombuluian tapantang kumaa Panakadai Montiri Kotundaan Kotos om Koburuon Teknologi Kopoilaan pogun Datuk Hamisa Samat, ih nogi lansanon rayat Tanjong Batu, hiti, songkosodop.

Osonong koponorimaan di Hamisa abaabayan dilo pinaharo id Tawau ih kapanahak asil kumaa tulun ngawi do hilo.

Tumanud dau, duo kinotutudan tagayo nantakan id Tanjong Batu di kawawagu, ino nopo nga id Kampung Pukat Tanjung Batu Laut kopohompit do kiikira 20 tinan lamin di ontok 29 Julai om 50 tinan lamin id Kampung Tanjung Batu Laut Tengah di ontok 2 Ogos.

“Alansan oku nogi do maya abaabayaan diti tulun ngawi songkoiyonon kaanu onuan do kopointalangan om kopoilaan miampai potilombus poingkuro ralan manampasi do tinan sondiri om momisok tapui mantad koinggayo/karalad.

“Kimpin Pomunsaan Kinotutudan Idsuang Mogigion kopoingkawas tiwou tonggungan kumaa mogigion taman nokomoi kogunoon kopio koumoligan kotutudan doulu noh mogigion id bogian pomulaminan ih kiharo mogigion togumu poingiyon mogisososok,” ka dau. - Bernama

MONTOK KAANDAMAN...Hamisa (tolu, wanan) om Nordin Fauzi (duo wanan) minokigambar kaandaman kalapas kinotombuluian tapantang doid upis disio. Nakaampai nogi kotombuluian tapantang dilo nga ih Kumoduo Potunud Koupisan Bomba om Manampasi Sabah, Zuraidah Latig (tolu mantad gibang), Ponulung Potunud Operasi, Khairul Azuwan Ibrahim (wanan), Ponulung Potunud Bogian Koumoligan Kotutudan, Jemris Olin (duo gibang) om Upisor Piturubungan Tulun Ginumuan, Mohd Affendy Ramin (gibang).