Bot monginsada kinoiyonon songowian 27 ‘awak-awak’ tulun songkosuaian tinahan
SANDAKAN: Agensi Popogirotkuasa Maritim Malaysia ( Maritim Malaysia) Watas Maritim 17 Sandakan ( DM17) minanahan iso bot monginsada kinoiyonon songowian 27 ‘awak-awak’ rayat Filipina kiikira 18 batu nautika mantad Pulau Billiean, di tadau Kotolu nakatalib.
Potunud Maritim DM17 Kapten Maritim A.Razak Abd Rahman minoboros do Kapal Maritim Malaysia ih pinapanau do pimpanaan ‘ Ops Pluto Timur’ nokokito iso bot monginsada kinoiyonon masaon mamanau pakaayan id kawaigan Pulau Malawali mantad ponong piwolitan kawaigan Malaysia-Filipina.
“Bot monginsada kinoiyonon dilo nakaanu minanahan kiikira jam 10.30 dongotuong om asil pinomorisaan nokoilo do kiginumu 27 ‘awak-awak’ rayat Filipina aiso surat kointutunan di totopot om duo tulun kagu kiharo surat IMM13 kiumur id bindurugan 14 gisom 52 toun,” ka dau id iso kopoilaan hiti konihab.
Tumanud dau, bot monginsada dilo kikotumbayaan minaganu ‘awak-awak’ rayat songkosuaian id Pulau Sibogo pogului nowit doid kawaigan Pulau Billiean montok papanau do kaparagatan magapon sada momoguno bot ngawi tokoodo ih kiharo id sakai bot monginsada dilo.
Kawagu dau, asil daat ih naanu kalapas diri tinimbang om pinadagang kumaa ‘tekong’.
Ka dau bot monginsada kinoiyonon dilo kalapas diri minomogowit asil daat dino nokomoi nowit doid Kudat id ponong kosuabon pogului tinahan id ponong dongosodop dino do naamot diolo miningkoyod.
Bot monginsada dilo winoyo suminuang doid Jeti DM17 montok patahakon kumaa Upisor Monoriuk Maritim Malaysia om soriukon tumanud Akta Imigresen 1959/63.