Puru Umno minog tumilombus papagaras parti, silihon parti lobi ointutunan - Salleh
KOTA BELUD: Puru UMNO, doulu noh id Bogian Kota Belud, pinosorou mooi tumilombus papagaras kapamanaan parti om poposiliu UMNO lobi ointutunan, ka di Montiri Komunikasi om Multimedia Datuk Seri Dr Salleh Said Keruak.
Salleh, ih nogi Luguan Umno Bogian Kota Belud, minoboros do toinsanan puru Umno nogi apatut papatantu do potitikid padamaan nopo nga otootopot montok papatantu do parti kotilombus ‘relevan’ om okon tulun pointantu.
Puru Umno, ka disio, apatut poposoribau do tiwou kiutang ginawo kumaa porinta di ogumu minogowit kotundaan pogun om okon ko kumaa tulun pointantuy.
“Mindaama tokou om kumaraja montok rayat maya parti (sabap) Umno mositi ointutunan (popular), ointutunan mantad tulun (momuruan) om kada siliho tulun lobi ‘popular’ mantad parti,” ka disio.
Salleh, ih nogi Bendahari Umno Longkod, minoboros ahal dilo ontok minanahak boboroson id pinonimpuunan Pitimbungakan Insan-Insan Palapa Koonduan, Komulakan om Puteri UMNO Bogian Kota Belud id Dewan Tun Said hiti konihab.
Pitimbungakan dilo pinotimpuun di Puru Tinan Takawas UMNO Tan Sri Noh Omar ih nogi Montiri Kolumaagan Kakadaian, Pomulaminan om Koporintaan Kinoiyonon.
Namot dilo, minoboros ih Salleh do aparti au obuli pitongkiadon miampai porosiden parti sabap ino nopo nga gamut doid toiso-iso parti.
Idsuang ahal dilo, minoboros isio do sokodung poimponu mositi patahakon doid Luguan Montiri Datuk Seri Najib Tun Razak ih nogi porosiden parti montok tumilombus momuruan id padamaan UMNO.
Minoboros ih Salleh do ‘gerakan’ ih muhang monuridong parti wagu timpu diti okitonan noopo muhang paparatu do UMNO noopo, om osiliu tonggungan puru Umno montok sumaap diolo sabaagi ‘musuh’ ih muhang mangala parti.
Iti, ka dau, kaamung noh mindahu gana (minsuang kakampungan) om papatarang do koyuon totootopot om papatarang do kolungguian ngawi bgian gugumaga. -Bernama