Potudukon id sikulan iso ralan tagaras popotungkus boros Kadazandusun
tosonong popotungkus Boros Kadazandusun (KD) kumaa sinakagon nopo nga potudukon id sikulan porinta om tikid tanak susumikul tinaru dilo mositi no (au kawasa nung au) do minsingilo boros dilo id sikulan.
Haro piipiro laang milo tonudon tulun KD do potungkus boros tina diti.
Koiso, mokianu o tulun tangapantang KD do kasagaan tagaras kopongoromitan do Koporintaan Koponontudukan (Ministry of Education) diti boros dilo do potudukon id sikulan porinta id pototongkop pogun Sabah om paganakan tulun dino i pongiyon om poingkaraja id Malaya.
Koduo, Mokianu tulun tangapantang KD do sokodung tulun mantad tinaru suai do monguhup tulun dino do lumantoi id pokimamaan popotungkus boros tinaru kumaa sinakagon.
Kotolu, tulun tangapantang KD mokianu kasagaan do porinta koponontudukan do popoompit kogunaan mongilo om koilo moboros (oral) boros tinaru dilo id panaasan SPM/STPM.
Kaapat, susuai ko moboros, mokianu nogi tulun KD do kasagaan mantad Dewan Bahasa dan Pustaka( DBP) do manahak liwang kopomogunaan boros tinaru dilo id gana koponuratan literature om id pisintoguan monurat novel, susuyan toniba (writing short stories) om id koponupuan sinding patriotic om pisompuruan tinaru i sindingon do susumikul KD id sikulan porinta i kogumuan do tanak susumikul montok tinaru dilo.
Kolimo, id kootuson sijil panaasan SPM/STPM dino poompiton o boros tinaru dilo sabaagi Mato Pinsingilaan (Subject) i kiguno kopio (compulsory subject) montok ngawi susumikul KD.
Koonom, susumikul KD i kalantoi id nunu nopo ponaasan, pingludaan, ponginabasan om pisintoguan montok koponimposian boros tinaru dilo nopo nga mositi do karamit do wawa tosonong kopiyo i poungkapon do kotinanan pinapaanjur do abaabayan di nokomoi. Nung kootus kopio miagal dilo id sawat, mamagatang (appreciate) om oliab (interested) o toinsanan susumikul KD do minsingilo boros tinaru dilo id sikulan.
Mantad do kapamagatangan dino, asaga dii o mongingindapu tagayo Sina mangaramit tulun KD do kumaraja id walai pongindopuan diolo. Kouhangan dilo mongingindapu (miagal dilo nopo nga ounsikou yolo kumaa tulun KD tu koilo moboros mamagayat ginawo momomoli do momoli gurangot toi ko makan id kadai taakanan (restaurant) diolo.
Mongingindapu Sina poingalib do arahi maganu sumandak KD tolundus om i koilo moboros boros tinaru dilo do kumaraja id walai pongindopuan diolo.
Suai tadau, muhang o tulun Sina do manansawo tondu KD om tanak diolo nopo nga tudukan di tama do toilalaan dau boros tinaru dilo om kotungkus o boros dilo mantad do sinakagon diolo.